दीपावलीत महाराष्ट्रात अग्नितांडव!, एका रात्रीत कोट्यवधींचे नुकसान!

मुंबई : दिवाळी म्हटलं की फटाक्यांची आतेषबाजी आली. दिवाळीत भुईचक्र, पाऊस, बॉम्ब, रॉकेट यांसारखे फटाके वाजवले जातात. मात्र याच फटाक्यांमुळे काही ठिकाणी आग लागल्याची भीषण दुर्घटना घडत असल्याचे पाहायला मिळत आहे. लक्ष्मीपूजन आणि दिवाळीच्या रात्री संपूर्ण महाराष्ट्रात आगीच्या अनेक मोठ्या घटना घडल्या. फटाक्यांच्या ठिणग्या आणि विजेच्या शॉर्ट सर्किटमुळे नवी मुंबई, नागपूर, शिर्डी यांसह अनेक दुकानात भीषण आग लागली. सुदैवाने यातील कोणतीही ठिकाणी जीवितहानी झालेली नाही. मात्र कोट्यवधी रुपयांचे आर्थिक नुकसान झाले आहे. यामुळे अग्निशमन दलाच्या जवानांना रात्रभर अथक प्रयत्न करून अनेक ठिकाणी आगीवर नियंत्रण मिळवावे लागले.

अहिल्यानगर जिल्ह्यातील शिर्डी शहरात साई मंदिराच्या एक नंबर प्रवेशद्वारासमोरील नगर-मनमाड महामार्गावर असलेल्या साई सिल्क बिग बाजार या साडीच्या दुकानाला मध्यरात्री भीषण आग लागली. फटाक्याच्या ठिणगीमुळे ही आग लागल्याचा प्राथमिक अंदाज आहे. आगीमुळे साडी मालकाचे आणि बाजूच्या इतर दुकानांचे कोट्यवधी रुपयांचे नुकसान झाले. शिर्डी नगरपरिषद, साईबाबा संस्थान आणि परिसरातील अग्निशमन दलाच्या तीन तासांच्या अथक प्रयत्नानंतर आगीवर नियंत्रण मिळवणे शक्य झाले.

नागपुरात 10 ठिकाणी आग –

नागपूर शहरात दिवाळीच्या रात्री फटाक्यांमुळे सुमारे दहा ते बारा ठिकाणी छोट्या-मोठ्या आगी लागल्याच्या घटना घडल्या. यामध्ये आठरस्ता चौकातील रिलायन्स स्मार्ट स्टोअरमध्ये भीषण आग लागली. तसेच पोलीस मुख्यालय मागे, बेसा-मनिषनगर आणि लकडगंज परिसरातही आगीच्या घटनांची नोंद झाली. मनपाच्या अग्निशमन दलाच्या अथक प्रयत्नानंतर रात्री उशिरा या सर्व आगींवर नियंत्रण मिळवण्यात यश आले.