विलवडे : नेतृत्व, कर्तृत्व व दातृत्व ही तिन्ही मूल्ये ज्या व्यक्तीत असतात, तोच खरा समाजाभिमुख नेता ठरतो. दिनेश गावडे हे त्याचे सजीव उदाहरण असून, गेली दहा वर्षे ते आंबोली–चौकुळ जिल्हा परिषद मतदारसंघातील प्रत्येक गावातील शाळांमध्ये शैक्षणिक साहित्याचे वितरण करून विद्यार्थ्यांच्या उज्ज्वल भविष्यासाठी योगदान देत आहेत. याबद्दलचा सार्थ अभिमान व्यक्त करत सकल हिंदू समाजाचे व मराठा समाजाचे जिल्हाध्यक्ष, तसेच कोकण लाईव्ह ब्रेकिंग न्यूज चॅनेलचे संपादक सीताराम गावडे यांनी विलवडे येथील राजा छत्रपती शिवाजी महाराज विद्यालयात अध्यक्ष स्थानावरून गौरवोद्गार काढले.
समाजोपयोगी उपक्रमांनी वाढदिवस साजरा –
प्रत्येक वर्षी २२ जुलै रोजी दिनेश गावडे यांचा वाढदिवस सामाजिक कार्यातून साजरा करण्यात येतो. यामध्ये आरोग्य मदत, शैक्षणिक साहित्य वाटप, गरजू महिलांना मदत अशा विविध उपक्रमांचा समावेश असतो. यंदाही चौकुळ, आंबोली, केसरी, दाणोली, सातोळी, बावळट, विलवडे, भालावल आदी गावांतील शाळांमध्ये विद्यार्थ्यांना शैक्षणिक साहित्याचे वाटप करण्यात आले.
प्लास्टिक मुक्तीचा संदेश – स्टील थर्मस बॉटलचे वितरण –
यावर्षी विशेष उपक्रम म्हणून विद्यार्थ्यांना स्टील थर्मस बॉटल वितरित करण्यात आल्या. प्लास्टिक बॉटलमुळे होणाऱ्या आरोग्याच्या समस्यांपासून विद्यार्थ्यांना वाचवण्यासाठी हा निर्णय घेण्यात आला. गरम व थंड पाणी ठेवण्यास उपयुक्त अशा या बॉटल्स विद्यार्थ्यांना वितरित करून “प्लास्टिक मुक्त अभियान” राबवले गेले. यामुळे पर्यावरण संवर्धनाबाबत विद्यार्थ्यांमध्ये जनजागृती होण्यास मदत झाली.
मार्गदर्शकांचे प्रेरणादायी विचार –
कार्यक्रमादरम्यान सीताराम गावडे म्हणाले, “विद्यार्थ्यांनी आपल्या आईवडिलांनी केलेल्या कष्टांचे स्मरण ठेवून सकारात्मक ऊर्जा बाळगावी. मी करणारच आणि मी होणारच, या आत्मविश्वासातून यश जन्माला येते.”
माजी मुख्याध्यापक भरत गावडे यांनी विद्यार्थ्यांना स्वावलंबी बनण्याचे महत्त्व सांगताना “वाचन, चिंतन आणि गुरुजनांचे ऐकणे” या तीन गोष्टींवर भर दिला.
दिनेश गावडे यांचा मुलांशी संवाद –
कार्यक्रमाच्या शेवटी दिनेश गावडे यांनी आपल्या शालेय जीवनातील गमतीजमती मुलांपुढे मांडल्या. त्यांच्या आठवणींमुळे हास्याचे पाझर फुटले व वातावरण हलकेफुलके झाले. शाळेतील विद्यार्थ्यांनी त्यांना वाढदिवसाच्या शुभेच्छा देत आनंद व्यक्त केला. या कार्यक्रमास दिनेश गावडे यांचे मित्रमंडळ देखील उपस्थित होते.
हा उपक्रम हा केवळ एक सामाजिक बांधिलकी नसून भावी पिढीच्या घडणीत मोलाचा वाटा ठरणारा आहे, असे मत ग्रामस्थांनी व पालकांनी व्यक्त केले. दिनेश गावडे यांचे हे कार्य इतरांसाठी प्रेरणादायी ठरत आहे.
