सावंतवाडी : दक्षिण कोकणचे प्रति पंढरपुर म्हणून प्रसिद्ध असलेल्या श्री देवी सोनुर्ली माऊलीचा वार्षिक जत्रौत्सवास प्रारंभ झाला आहे. लोटांगणाची जत्रा म्हणून प्रसिद्ध असलेल्या देवी माऊलीच्या जत्रौत्सवासाठी महाराष्ट्र, गोवा, कर्नाटक व इतर राज्यातूनही भाविकांनी पहाटेपासूनच सोनुर्लीत गर्दी केली आहे.
जत्रौत्सवानिमित्त दर्शनासाठी व ओटी भरण्यासाठी पहाटेपासूनच हजारोंच्या संख्येने भविकांच्या रांगा लागल्या आहेत. पोलिस प्रशासनाबरोबरच देवस्थान कमिटी व स्थानिक भक्त मंडळाने चोख नियोजन केले असल्यामुळे भाविकांना सुलभपणे दर्शन घेता येत आहे. रात्री उशिरा लोटांगण सोहळा संपन्न होणार आहे. पुरुष व महिला आपले नवस फेडणार आहेत. उद्या तुळाभारानंतर उत्सवाची सांगता होणार आहे.
