सावंतवाडी : डी. जी. बांदेकर ट्रस्टच्या ‘कसब’ वार्षिक कलाप्रदर्शनाच्या निमित्ताने आयोजित प्रसिद्ध सुलेखनकार श्री. सिद्धेश नेरुरकर यांच्या सुलेखन कार्यशाळेला रसिक प्रेक्षकांचा उत्स्फूर्त प्रतिसाद लाभला. कार्यशाळेतील विविध रंगसंगती आणि आकारांत साकारलेल्या सुभाषितांनी आणि गुढी पाडव्याच्या शुभेच्छा संदेशांनी उपस्थितांचे लक्ष वेधले.
सुलेखन ही केवळ अक्षरकला नसून, त्यात सृजनशीलतेचा मिलाफ असतो. नेरुरकर यांनी उपस्थितांना सुलेखनाची मूलतत्त्वे आणि त्यातील बारकावे सविस्तर समजावून सांगितले. प्रात्यक्षिकांच्या माध्यमातून त्यांनी सुलेखनाची विविध तंत्रे उलगडून दाखवली. कार्यशाळेच्या वेळी प्रेक्षकांनीही स्वतः सुलेखन करून या कलेचा मनमुराद आनंद घेतला.
कार्यशाळेतील वैशिष्ट्यपूर्ण भाग म्हणजे विविध रंगछटांमध्ये तयार केलेले सुभाषित आणि गुढी पाडव्याच्या शुभेच्छा देणाऱ्या आकर्षक संदेशांनी उपस्थित रसिकांना मंत्रमुग्ध केले. अनेकांनी स्वतः सुलेखनाचा सराव करत या कलेच्या नव्या अंगांची ओळख करून घेतली.
कार्यशाळेच्या माध्यमातून कलाक्षेत्रातील विद्यार्थ्यांना आणि रसिकांना अक्षरकलेच्या सौंदर्याची अनुभूती मिळाली. ही कार्यशाळा कलाप्रेमींना प्रेरणादायी ठरली आणि सुलेखनासारख्या कलाप्रकाराची ओळख नव्या पिढीला घडवण्याचा महत्त्वाचा प्रयत्न ठरला.
कार्यशाळेचे सूत्रसंचालन प्रा. तुकाराम मोरजकर यांनी केले, तर प्रा. प्राजक्ता वेंगुर्लेकर यांनी आभार प्रदर्शन केले. कलारसिकांनी या कार्यशाळेचे मनःपूर्वक स्वागत केले.
ADVT –
