ब्रिटन : एखादा माणूस स्वतःचा देश बनवू शकतो, असं तुम्हाला कधी वाटलं आहे का? ऐकायला हे विचित्र वाटतं, पण ब्रिटनच्या 20 वर्षांच्या डेनियल जॅक्सन या तरुणाने हे करून दाखवलं आहे. त्याने क्रोएशिया आणि सर्बिया यांच्यातील एका वादग्रस्त जमिनीवर स्वतःचा एक नवीन देश तयार केला आहे, ज्याचं नाव आहे ‘द फ्री रिपब्लिक ऑफ वर्डिस’ आणि विशेष म्हणजे, डॅनियलने स्वतःला या देशाचा राष्ट्रपती म्हणूनही घोषित केले आहे.
या अनोख्या देशाची निर्मिती कशी झाली?, हे जाणून घेऊया.
भौगोलिक स्थान: ‘वर्डिस’ नावाचा हा देश सुमारे 125 एकर जमिनीवर पसरलेला आहे, जो डॅन्यूब नदीच्या किनाऱ्यावर आहे. ही जमीन ‘पॉकेट थ्री’ नावाने ओळखली जाते आणि कोणताही देश यावर आपला अधिकृत हक्क सांगत नाही. याच संधीचा फायदा घेऊन डॅनियलने याला आपला देश घोषित केला.
राजकीय रचना: या देशाचा स्वतःचा झेंडा आहे, युरो हे अधिकृत चलन आहे, इंग्रजी, क्रोएशियन आणि सर्बियन भाषा आहेत. या देशाचे एक छोटे मंत्रिमंडळ देखील आहे.
नागरिकत्व: या देशाचे स्वतःचे नागरिकत्व आहे आणि आतापर्यंत सुमारे 400 लोक त्याचे अधिकृत नागरिक बनले आहेत. डॅनियलच्या म्हणण्यानुसार, त्यांना डॉक्टर, पोलीस यांसारखे कुशल लोक जास्त हवे आहेत.
या देशाची सुरुवात कशी झाली?
डेनियल सांगतात की, त्यांनी 14 वर्षांचे असतानाच आपल्या मित्रांसोबत या देशाचे स्वप्न पाहिले होते. 18 वर्षांचे झाल्यावर त्यांनी वर्डिसला कायदेशीर रूप देण्यास सुरुवात केली कायदे बनवले, झेंडा तयार केला आणि आपली टीम बनवली.
समस्या आणि भविष्यातील योजना
पोलिसांची कारवाई: ऑक्टोबर 2023 मध्ये, डॅनियल आणि त्यांच्या काही सहकाऱ्यांना क्रोएशियन पोलिसांनी ताब्यात घेतले आणि त्यांना देशातून बाहेर काढले. ‘राष्ट्रीय सुरक्षेला धोका’ असल्याचं कारण पोलिसांनी दिलं.
‘वनवास’मधून कारभार: सध्या डॅनियल क्रोएशियात आजीवन बंदी घातल्यामुळे, ते ‘निर्वासन’मध्ये राहून वर्डिसचा कारभार ऑनलाइन चालवत आहेत.
भविष्यातील ध्येय: डॅनियल यांना आशा आहे की, ते एक दिवस पुन्हा वर्डिसमध्ये परत येतील आणि तिथे निवडणुका घेऊन लोकशाही स्थापन करतील.
हजारो लोकांनी वर्डिसच्या पासपोर्ट आणि नागरिकत्वासाठी उत्सुकता दर्शवली आहे. पण डॅनियल नागरिकांना इशारा देतात की, या पासपोर्टचा आंतरराष्ट्रीय प्रवासासाठी वापर करू नका. डॅनियल यांना विश्वास आहे की, क्रोएशिया या जमिनीवर हक्क सांगत नाही, त्यामुळे त्यांचे स्वप्न अजूनही जिवंत आहे.
