सावंतवाडी : सिंधुदुर्ग जिल्ह्यातील ‘जेसीआय’ सावंतवाडीच्या पहिल्या पदग्रहण सोहळ्याचे आयोजन रविवार, दि. १४ डिसेंबर २०२५ रोजी एस.पी.के. कॉलेज हॉल, सावंतवाडी येथे मोठ्या उत्साहात करण्यात आले. या कार्यक्रमामुळे सावंतवाडी परिसरात जेसीआय चळवळीच्या विस्ताराला एक नवे पर्व सुरू झाले आहे.
कार्यक्रमाची सुरुवात मान्यवरांच्या औपचारिक आगमनाने झाली. अध्यक्ष जेएफएम सुशांत गोवेकर यांनी ‘कॉल टू ऑर्डर’ दिल्यानंतर जेसीआय क्रीडा व मिशन स्टेटमेंटचे सामूहिक पठण करण्यात आले. यामुळे नेतृत्व विकास व सामाजिक सेवेसाठी जेसीआयची बांधिलकी अधोरेखित झाली.
स्वागतपर भाषणात अध्यक्ष जेएफएम सुशांत गोवेकर यांनी जेसीआय सावंतवाडीच्या स्थापनेमागील उद्देश, दृष्टीकोन व भावी कार्य आराखडा मांडला. कार्यक्रमास प्रमुख पाहुणे म्हणून माजी एनव्हीपी जेसीआय सेन संदीप मोरजकर, सन्माननीय अतिथी झोन अध्यक्ष जेएफडी शबा गांवस आणि विशेष आमंत्रित झोन अध्यक्ष-निर्वाचित जेएफएम ममता नाईक उपस्थित होते.
यावेळी जेसीआय सावंतवाडीच्या स्थापनेत मोलाचे योगदान देणाऱ्या अॅड. अनिल केसरकर व अॅड. समीर वंजारी यांचा विशेष सत्कार करण्यात आला. त्यानंतर विस्तार अध्यक्षांनी संस्थेच्या स्थापनेचा प्रवास व सर्वांच्या संयुक्त प्रयत्नांची माहिती दिली.
नवीन सदस्यांचा परिचय व शपथविधी झोन अध्यक्षांच्या हस्ते पार पडला. दीपप्रज्वलनाद्वारे जेसीआय सावंतवाडीचे औपचारिक उद्घाटन करण्यात आले. हा क्षण ज्ञान, एकता व सेवाभावाचे प्रतीक ठरला.
संस्थेच्या संस्थापक अध्यक्ष म्हणून जेसी श्रद्धा गोवेकर केसरकर यांचा परिचय करून देण्यात आला. अध्यक्ष जेएफएम सुशांत गोवेकर यांच्या हस्ते त्यांचा पदग्रहण पार पडला. मान्यवरांच्या हस्ते कॉलर, गॅव्हल व पिन प्रदान करून नेतृत्वाची अधिकृत जबाबदारी सोपविण्यात आली. स्वीकृती भाषणात अध्यक्ष जेसी श्रद्धा गोवेकर केसरकर यांनी आभार व्यक्त करत प्रभावी उपक्रम व सदस्य विकासासाठी कटिबद्ध राहण्याचा निर्धार व्यक्त केला.
यानंतर गव्हर्निंग बोर्ड सदस्यांचा परिचय व शपथविधी अध्यक्षांच्या हस्ते पार पडला. तसेच ज्युनिअर जेसी चेअरपर्सन यांचा परिचय करून देण्यात आला.
कार्यक्रमात झोन अध्यक्ष-निर्वाचित जेएफएम ममता नाईक, झोन अध्यक्ष जेएफडी शबा गांवस आणि प्रमुख पाहुणे माजी एनव्हीपी जेसीआय सेन संदीप मोरजकर यांनी मार्गदर्शनपर भाषणे केली. त्यांनी नेतृत्वगुण, संघटनात्मक वाढ व समाजसेवेचे महत्त्व अधोरेखित केले.
कार्यक्रमाच्या शेवटी मान्यवरांचा सत्कार करण्यात आला. सचिव जेसी विनेश तवाडे यांनी आभार प्रदर्शन केले. औपचारिक स्थगनाने कार्यक्रमाची सांगता झाली.
जेसीआय सावंतवाडीचा पहिला पदग्रहण सोहळा हा नेतृत्वनिर्मिती व समाजहिताच्या कार्यासाठी भक्कम पायाभरणी करणारा ऐतिहासिक आणि स्मरणीय क्षण ठरला.
