पाटणा : पाटणा जिल्हा न्यायालयाने प्रसिद्ध शिक्षक आणि युट्युबर फैसल खान उर्फ ‘खान सर’ यांना मोठा दिलासा दिला आहे. न्यायालयाने त्यांच्या अटकेला तात्पुरती स्थगिती देत पुढील सुनावणीपर्यंत कोणतीही कठोर कारवाई करू नये, असे आदेश दिले आहेत. त्यामुळे खान सर यांच्या समर्थकांमध्ये समाधानाचे वातावरण निर्माण झाले आहे.
पटण्यातील मुसल्लहपूर भागातील ‘खान ग्लोबल स्टडी’ कोचिंग सेंटरबाहेर काही दिवसांपूर्वी गोंधळ आणि हिंसाचाराची घटना घडली होती. या प्रकरणात फैसल खान यांच्यावर सुरक्षा रक्षकांना गर्दीवर गोळीबार करण्याचे आदेश दिल्याचा गंभीर आरोप करण्यात आला आहे. या घटनेनंतर पोलिसांनी तपास सुरू केला असून अनेकांची चौकशी करण्यात येत आहे.
सुरक्षा रक्षकांनी तपास यंत्रणांना दिलेल्या माहितीनुसार, आंदोलन वाढत असताना खान सर यांनी कठोर भूमिका घेतल्याचा दावा करण्यात आला आहे. मात्र, खान सर यांच्या वकिलांनी हे सर्व आरोप फेटाळले असून न्यायालयात बाजू मांडली आहे. या प्रकरणाची पुढील सुनावणी लवकरच होणार असून संपूर्ण राज्याचे लक्ष या खटल्याकडे लागले आहे.
