जिल्हास्तरीय स्पर्धेत मुक्ताई ॲकेडमीच्या खेळाडूंची चमकदार कामगिरी; गार्गीचे सलग तिसऱ्या वर्षी निर्विवाद वर्चस्व
कणकवली : बुद्धिबळाच्या पटावर आपल्या गुणवत्तेची आणि सातत्याची पुन्हा एकदा मोहोर उमटवत मुक्ताई ॲकेडमीच्या पाच विद्यार्थ्यांनी जिल्हास्तरीय शालेय बुद्धिबळ स्पर्धेत उल्लेखनीय यश संपादन केले आहे. साक्षी रामदूरकर, गार्गी सावंत, आहना पालव, चिदानंद रेडकर आणि लिएण्डर पिंटो या पाचही खेळाडूंची सांगली येथे होणाऱ्या विभागस्तरीय बुद्धिबळ स्पर्धेसाठी निवड झाली आहे.
क्रीडा व युवक सेवा संचालनालय, महाराष्ट्र राज्य तसेच सिंधुदुर्ग जिल्हा क्रीडाधिकारी कार्यालयाच्या वतीने कणकवली येथे शालेय जिल्हास्तरीय बुद्धिबळ स्पर्धेचे आयोजन करण्यात आले होते. या स्पर्धेत मुक्ताई ॲकेडमीच्या खेळाडूंनी आपल्या कौशल्यपूर्ण खेळाचे दर्शन घडवत दिमाखदार कामगिरी केली.
सतरा वर्षांखालील गटात राष्ट्रीय कॅरमपटू साक्षी रामदूरकर हिने तिसरा क्रमांक मिळवत सलग पाचव्यांदा विभागस्तरीय स्पर्धेचा मान मिळवला. बुद्धिबळासोबतच कॅरममध्येही राष्ट्रीय स्तरावर ठसा उमटविणाऱ्या साक्षीच्या या सातत्यपूर्ण कामगिरीचे विशेष कौतुक होत आहे.
चौदा वर्षांखालील मुलींच्या गटात आंतरराष्ट्रीय रेटेड खेळाडू गार्गी सावंत हिने पुन्हा एकदा आपल्या खेळाचा दबदबा कायम ठेवत प्रथम क्रमांक पटकावला. विशेष म्हणजे, गार्गीने सलग तीन वर्षे विभागस्तरीय स्पर्धेसाठी पात्र ठरत आपल्या गटावर निर्विवाद वर्चस्व राखले आहे.
मुक्ताई ॲकेडमीची कुडाळ येथील विद्यार्थिनी आहना पालव हिने पहिल्याच सहभागात चौदा वर्षांखालील गटात द्वितीय क्रमांक मिळवत आपली गुणवत्ता सिद्ध केली. त्याचप्रमाणे लिएण्डर पिंटो यानेही पहिल्याच प्रयत्नात चौदा वर्षांखालील गटात द्वितीय क्रमांक पटकावला. आंतरराष्ट्रीय रेटेड खेळाडू चिदानंद रेडकर याने चौदा वर्षांखालील गटात तृतीय क्रमांक मिळवत विभागस्तरीय स्पर्धेतील आपले स्थान निश्चित केले.
दहा वर्षांची यशस्वी परंपरा कायम!
मुक्ताई ॲकेडमीच्या विद्यार्थ्यांनी गेल्या दशकभरात शालेय बुद्धिबळ स्पर्धांमध्ये विभाग तसेच राज्यस्तरावर सातत्याने उल्लेखनीय कामगिरी केली आहे. राज्य आणि राष्ट्रीय स्तरावर अनेक पारितोषिके मिळविणाऱ्या मुक्ताई ॲकेडमीने बुद्धिबळ क्षेत्रात कोकणात आपली स्वतंत्र ओळख निर्माण केली आहे.
या यशामागे मुक्ताई ॲकेडमीचे अध्यक्ष व ज्येष्ठ प्रशिक्षक कौस्तुभ पेडणेकर तसेच राष्ट्रीय बुद्धिबळपटू व प्रशिक्षक बाळकृष्ण पेडणेकर यांचे मार्गदर्शन लाभले. त्यांच्या मार्गदर्शनाखाली विद्यार्थ्यांनी केलेल्या अथक सरावाचे आणि मेहनतीचे हे यश असल्याचे सांगण्यात आले.
ॲकेडमीच्या सरचिटणीस सौ. स्नेहा पेडणेकर यांनी सर्व यशस्वी विद्यार्थ्यांचे अभिनंदन करून सांगली येथे होणाऱ्या विभागस्तरीय स्पर्धेसाठी त्यांना शुभेच्छा दिल्या. मुक्ताई ॲकेडमीच्या या दमदार यशाबद्दल विविध स्तरांतून विद्यार्थ्यांवर कौतुकाचा वर्षाव होत आहे.
सांगलीच्या विभागस्तरीय स्पर्धेतही मुक्ताई ॲकेडमीचे हे पाचही बुद्धिबळपटू आपली विजयी परंपरा कायम ठेवणार का, याकडे क्रीडाप्रेमींचे लक्ष लागले आहे.
