मायेचा वटवृक्ष हरपला! – सिंधुदुर्ग जिल्हा मुख्याध्यापक संघाचे अध्यक्ष वामन तर्फे यांच्या मातोश्री सीताबाई तर्फे यांचे निधन; कणकवलीतील निवासस्थानी घेतला अखेरचा श्वास!

कणकवली  : कुटुंबाच्या आभाळाला मायेची सावली देणारा मातृत्वाचा वटवृक्ष काळाच्या पडद्याआड गेला की, आयुष्यातील एक हक्काचा आधारच हरपतो… अशीच हृदय पिळवटून टाकणारी घटना कणकवली येथे घडली आहे. त्रिमूर्ती माध्यमिक विद्यालय, शिरवंडेचे मुख्याध्यापक तथा सिंधुदुर्ग जिल्हा मुख्याध्यापक संघाचे अध्यक्ष श्री. वामन रामचंद्र तर्फे यांच्या मातोश्री श्रीमती सीताबाई रामचंद्र तर्फे (वय ८४) यांचे मंगळवार, दिनांक १७ नोव्हेंबर २०२६ रोजी पहाटे ५ वाजण्याच्या सुमारास कणकवली येथील राहत्या निवासस्थानी अल्पशा आजाराने दुःखद निधन झाले. त्यांच्या निधनाने तर्फे कुटुंबावर दुःखाचा डोंगर कोसळला असून परिसरात हळहळ व्यक्त होत आहे.

आयुष्यभर मायेचा पदर पांघरून कुटुंबाला प्रेम, संस्कार आणि आपुलकीची शिदोरी देणारी आई म्हणजे प्रत्येकाच्या आयुष्यातील सर्वात मोठी संपत्ती! तिच्या मायेच्या सावलीत मुलांचे विश्व फुलते, तिच्या आशीर्वादाने जीवनाला दिशा मिळते आणि तिच्या अस्तित्वाने घराला घरपण लाभते. मात्र, काळाच्या कठोर नियतीने तर्फे कुटुंबाच्या डोक्यावरील मायेचे छत्र हिरावून घेतले आहे.

श्री. वामन तर्फे यांच्या जडणघडणीत आणि आयुष्याच्या वाटचालीत सीताबाई यांचे योगदान मोलाचे होते. आईचे प्रेम, तिचे संस्कार, तिचे मार्गदर्शन आणि तिचे आशीर्वाद हीच त्यांच्या जीवनाची खरी शिदोरी होती. एका कर्तृत्ववान शिक्षकाच्या आयुष्यामागे उभ्या असलेल्या या माऊलीच्या निधनाने कुटुंबीयांसह शैक्षणिक वर्तुळातील अनेकांना दुःख झाले आहे.

मायेचा गोतावळा मागे ठेवून अनंताच्या प्रवासाला…

श्रीमती सीताबाई तर्फे यांच्या पश्चात दोन मुली, एक मुलगा श्री. वामन तर्फे, जावई, सून आणि नातवंडे असा मोठा परिवार आहे. त्यांच्या निधनाची वार्ता समजताच शैक्षणिक, सामाजिक तसेच विविध क्षेत्रांतील मान्यवरांनी तर्फे कुटुंबीयांप्रती शोकसंवेदना व्यक्त केल्या.

आज मूळगावी अंत्यसंस्कार

श्रीमती सीताबाई तर्फे यांच्या पार्थिवावर आज, मंगळवार दिनांक १७ नोव्हेंबर २०२६ रोजी दुपारी १२ वाजता त्यांच्या मूळगावी जांभवडे (भूतवड बामनवाडी) येथील स्मशानभूमीत अंत्यसंस्कार करण्यात येणार आहेत.

सत्यार्थ महाराष्ट्र न्यूज परिवाराकडून भावपूर्ण श्रद्धांजली!

आई कधीच केवळ आठवण होत नाही; ती आपल्या संस्कारांतून, विचारांतून आणि प्रत्येक श्वासागणिक आपल्यासोबत जगत राहते. तिचे हात डोक्यावर नसले तरी तिच्या आशीर्वादाची ऊब आयुष्यभर सोबत असते. श्रीमती सीताबाई तर्फे यांच्या पवित्र स्मृतींना ‘सत्यार्थ महाराष्ट्र न्यूज’ परिवाराच्या वतीने विनम्र अभिवादन!

या दुःखद प्रसंगी मुख्याध्यापक श्री. वामन तर्फे व समस्त तर्फे कुटुंबीयांच्या दुःखात आम्ही सहभागी आहोत. परमेश्वर दिवंगत आत्म्यास चिरशांती देवो आणि तर्फे कुटुंबीयांना या दुःखातून सावरण्याचे बळ प्रदान करो, हीच ईश्वरचरणी प्रार्थना!

भावपूर्ण श्रद्धांजली!

Related Articles

Stay Connected

0FansLike
0FollowersFollow
0SubscribersSubscribe
- Advertisement -spot_img

Latest Articles