मनसैनिकांनीच वाचवला ‘त्या’ युवकाचा जीव अन् मनसेचीच बदनामी! ; एका वेब पोर्टलच्या ‘अर्धवट’ वृत्तावर ॲड. अनिल केसरकरांचा संताप.

सावंतवाडी : फेसबुक या सोशल मीडियावर एका युवतीच्या बाबतीत बदनामीकारक टिपणी करणाऱ्या कुडाळ तालुक्यातील एका गावातील युवकाला जाब विचारण्यासाठी गेल्यानंतर घडलेल्या घटनेचे विकृत चित्र रंगवत महाराष्ट्र नवनिर्माण सेनेची तसेच संबंधित युवतीची बदनामी करण्याचा प्रयत्न करण्यात आला असल्याचा गंभीर आरोप मनसेचे जिल्हाध्यक्ष ॲड. अनिल केसरकर यांनी केला आहे. अपूर्ण माहितीच्या आधारे बातमी प्रसारित करणाऱ्या संबंधित वेब पोर्टल आणि पत्रकाराचा त्यांनी जाहीर निषेध करत अशा बेजबाबदार पत्रकारितेला मनसेकडून कठोर उत्तर दिले जाईल, असा इशाराही दिला.
सावंतवाडी येथे आयोजित पत्रकार परिषदेत ते बोलत होते. यावेळी जिल्हा उपाध्यक्ष सुधीर राऊळ, तालुकाध्यक्ष मिलिंद सावंत तसेच या संपूर्ण प्रकरणातील सोशल मीडियावर प्रसिद्ध असलेली संबंधित युवती उपस्थित होती.
ॲड. केसरकर म्हणाले, “सोशल मीडियावर युवतीची बदनामीकारक टिपणी करणाऱ्या संबंधित युवकाला आम्ही भेटण्यासाठी गेलो असता त्याने अचानक विहिरीत उडी घेतली. मात्र मानवतेचा परिचय देत मनसेच्या सैनिकांनी तत्काळ धाव घेत त्याचा जीव वाचवला आणि त्याला सुखरूप बाहेर काढले. त्यानंतर त्याच्या कुटुंबीयांची भेट घेऊन संपूर्ण प्रकाराची माहिती दिली असता, तो युवक स्वतःच्या कुटुंबीयांनाही त्रास देत असल्याचे समोर आले.”
“संपूर्ण वस्तुस्थिती वेगळी असताना सावंतवाडी येथील एका पत्रकाराने अर्धवट आणि एकतर्फी माहितीच्या आधारे बातमी प्रसारित करून मनसेची प्रतिमा मलीन करण्याचा प्रयत्न केला. पत्रकारितेची जबाबदारी ओळखून सत्य पडताळून पाहणे अपेक्षित असताना तसे झाले नाही. यापुढे अशा प्रकारची बदनामी सहन केली जाणार नाही,” असा इशारा त्यांनी दिला.
यावेळी संबंधित युवतीनेही आपली भूमिका स्पष्ट करत संबंधित पत्रकाराकडून वारंवार मानसिक त्रास दिला जात असल्याचा आरोप केला. “माझा त्यांच्याशी कोणताही संबंध नसताना मला सतत लक्ष्य केले जाते. माझी बदनामी करण्याचा प्रयत्न का केला जातो?, याचे उत्तर त्यांनी द्यावे,” असा परखड सवाल तिने उपस्थित केला.
तसेच सोशल मीडियाच्या वाढत्या प्रभावामुळे व्यक्तींची विनाकारण बदनामी करण्याचे प्रकार वाढत असल्याची खंत व्यक्त करत, समाजात अशा विकृत प्रवृत्तींना आळा बसणे गरजेचे असल्याचेही तिने नमूद केले.
पत्रकार परिषदेत मनसे पदाधिकाऱ्यांनी संबंधित वृत्ताचा तीव्र शब्दांत निषेध नोंदवत, सत्य समोर आणण्यासाठी आणि बदनामी करणाऱ्यांविरोधात आवश्यक ती भूमिका घेण्याचा निर्धार व्यक्त केला.