सिंधुदुर्ग : सिंधुदुर्ग जिल्ह्यातील अनुसूचित जाती व नवबौद्ध समाजासाठी आनंदाची बातमी असून, भारतरत्न डॉ. बाबासाहेब आंबेडकर सामाजिक विकास योजनेअंतर्गत सन २०२६-२७ या आर्थिक वर्षासाठी जिल्ह्यातील विविध विकासकामांना राज्य शासनाने मंजुरी दिली आहे. पालकमंत्री नितेश राणे यांच्या सातत्यपूर्ण पाठपुराव्यामुळे जिल्ह्यासाठी १५६ विकासकामांना मंजुरी मिळाली असून, त्यासाठी ७ कोटी ९९ लाख २० हजार रुपयांचा निधी उपलब्ध झाला आहे.
सामाजिक न्याय व विशेष सहाय्य विभागाने यासंदर्भातील शासन निर्णय जारी केला असून, या निधीच्या माध्यमातून अनुसूचित जाती व नवबौद्ध वस्त्यांमध्ये आवश्यक पायाभूत सुविधा उभारण्यास गती मिळणार आहे. तसेच सामाजिक, सांस्कृतिक आणि विकासात्मक कामांनाही चालना मिळणार आहे.
वस्त्यांमध्ये होणार विकासाचा नवा उजेड
या योजनेतून रस्ते, गटारे, सभामंडपे, समाजमंदिरे, वीज व प्रकाश व्यवस्था, पिण्याच्या पाण्याच्या सुविधा तसेच इतर आवश्यक विकासकामे राबविण्यात येणार आहेत. त्यामुळे अनेक वर्षांपासून प्रलंबित असलेल्या मूलभूत सुविधांचा प्रश्न मार्गी लागण्यास मदत होणार आहे.
विविध यंत्रणांमार्फत होणार कामांची अंमलबजावणी
मंजूर विकासकामांची अंमलबजावणी सार्वजनिक बांधकाम विभाग, जिल्हा परिषद, नगरपालिका, नगरपंचायत, ग्रामपंचायत तसेच शासनाच्या अन्य संबंधित यंत्रणांमार्फत करण्यात येणार आहे. तांत्रिक मान्यता, आराखडे आणि अंदाजपत्रकांची पूर्तता करूनच निविदा प्रक्रिया राबविण्याचे स्पष्ट निर्देश शासनाने दिले आहेत.
समाजाच्या सर्वांगीण विकासासाठी महत्त्वाचे पाऊल
या निधीमुळे अनुसूचित जाती व नवबौद्ध समाजाच्या वस्त्यांमध्ये विकासाची नवी पहाट उगवणार असून, मूलभूत सुविधांसह जीवनमान उंचावण्यास मोठी मदत होणार आहे. पालकमंत्री नितेश राणे यांच्या प्रयत्नांमुळे सिंधुदुर्ग जिल्ह्याला मिळालेला हा निधी सामाजिक न्यायाच्या दिशेने एक महत्त्वाचे पाऊल मानला जात आहे.
ठळक मुद्दे –
✅ १५६ विकासकामांना मंजुरी
✅ ७.९९ कोटी रुपयांचा निधी उपलब्ध
✅ अनुसूचित जाती व नवबौद्ध वस्त्यांमध्ये मूलभूत सुविधा
✅ प्रकाश व्यवस्था, रस्ते, गटारे, सभामंडप आदी कामांना गती
✅ पालकमंत्री नितेश राणे यांच्या पाठपुराव्याला यश.
“विकासाच्या मुख्य प्रवाहात प्रत्येक वस्तीला आणण्याच्या दिशेने सिंधुदुर्गसाठी ही मोठी संधी ठरणार आहे.”
