सावंतवाडी : चौसष्ट घरांच्या पटावर बुद्धी, संयम आणि अचूक डावपेचांची कसोटी लागते; अशाच या बुद्धिबळाच्या मैदानात मिलाग्रीस हायस्कूल, सावंतवाडीच्या विद्यार्थ्यांनी आपल्या गुणवत्तेची दमदार छाप उमटवत जिल्हास्तरीय स्पर्धेत शानदार यश संपादन केले. एकाच स्पर्धेत तीन विद्यार्थ्यांनी पदकांवर नाव कोरत शाळेच्या क्रीडा क्षेत्रात मानाचा तुरा रोवला आहे.
DSO सिंधुदुर्ग जिल्हास्तरीय बुद्धिबळ स्पर्धेत १४ वर्षांखालील मुलांच्या गटात लिअँडर पिंटो याने उत्कृष्ट खेळाचे प्रदर्शन करत द्वितीय क्रमांक, तर चिदानंद रेडकर याने तृतीय क्रमांक पटकावला. दोन्ही खेळाडूंनी आपल्या चतुर खेळीने प्रतिस्पर्ध्यांना कडवी झुंज देत उल्लेखनीय यश मिळविले.
दरम्यान, १७ वर्षांखालील मुलांच्या गटात यथार्थ डांगी याने द्वितीय क्रमांक पटकावत मिलाग्रीस हायस्कूलच्या यशात आणखी एक मानाचा अध्याय जोडला. या तिन्ही विद्यार्थ्यांच्या कामगिरीमुळे स्पर्धेच्या पटावर मिलाग्रीस हायस्कूलच्या नावाची जोरदार नोंद झाली.
बुद्धिबळातील हे यश विद्यार्थ्यांच्या एकाग्रतेसोबतच बुद्धिचातुर्य, निर्णयक्षमता आणि सातत्यपूर्ण सरावाचे फलित मानले जात आहे. तीनही यशस्वी विद्यार्थ्यांचे शाळेच्या वतीने अभिनंदन करण्यात आले.
या उल्लेखनीय कामगिरीबद्दल प्रशालेचे मुख्याध्यापक फादर रिचर्ड सालदान्हा यांनी लिअँडर पिंटो, चिदानंद रेडकर आणि यथार्थ डांगी यांचे मनःपूर्वक अभिनंदन करून त्यांच्या पुढील क्रीडा वाटचालीसाठी शुभेच्छा दिल्या. तसेच शिक्षक व शिक्षकेतर कर्मचाऱ्यांनीही यशस्वी विद्यार्थ्यांचे कौतुक करत त्यांच्या उज्ज्वल भविष्यासाठी शुभेच्छा व्यक्त केल्या.
