सावंतवाडी : सावंतवाडी शहरातील बाहेरचावाडा परिसरात चोरट्या पद्धतीने गोवा बनावटीची दारू विक्री करण्याच्या उद्देशाने बाळगल्याप्रकरणी सावंतवाडी पोलिसांनी एका व्यक्तीविरुद्ध महाराष्ट्र दारूबंदी अधिनियमांतर्गत गुन्हा दाखल केला आहे. या कारवाईत विविध ब्रँडच्या एकूण २३ दारूच्या बाटल्या, असा पोलिसांनी नमूद केलेला एकूण मुद्देमाल ४ हजार १०० रुपये किमतीचा जप्त करण्यात आला.
पोलिसांनी दिलेल्या माहितीनुसार, १ ऑक्टोबर २०२६ रोजी सायंकाळी सुमारे ६.५५ वाजता सावंतवाडी बाहेरचावाडा येथील नॅशनल उघड्या बेकरी परिसरात ही कारवाई करण्यात आली. यावेळी मोहंमद शमीम छेदी (वय ३६, रा. घर नं. सी-२९१, बुराणगली, बाहेरचावाडा, ता. सावंतवाडी) हा गोवा बनावटीची दारू विक्रीच्या उद्देशाने ताब्यात बाळगताना आढळून आल्याचे पोलिसांनी सांगितले.
कारवाईदरम्यान GOLDEN ब्रँडच्या १८० मिलीच्या १६ बाटल्या (किंमत १,९२० रुपये), ROYAL STAG ब्रँडच्या दोन बाटल्या (७६० रुपये), OLD MONK ब्रँडच्या तीन बाटल्या (७८० रुपये) आणि DSP BLACK ब्रँडच्या दोन बाटल्या (६४० रुपये) असा एकूण ४,१०० रुपयांचा मुद्देमाल जप्त करण्यात आला.
या प्रकरणी महाराष्ट्र दारूबंदी अधिनियम १९४९ चे कलम ६५(ई) अन्वये सावंतवाडी पोलीस ठाण्यात गुन्हा क्रमांक २६६/२०२६ दाखल करण्यात आला आहे. आरोपीला अटक न करता कलम ३५(३) अन्वये नोटीस बजावण्यात आल्याची माहिती पोलिसांनी दिली.
या प्रकरणाचा पुढील तपास हेड कॉन्स्टेबल १७४ धुरी करीत आहेत. गुन्हा दाखल करण्याची कार्यवाही हेड कॉन्स्टेबल १०२७ जाधव यांनी केली. पोलीस निरीक्षक राजेंद्र मगदूम यांच्या मार्गदर्शनाखाली हेड कॉन्स्टेबल ३५२ धोत्रे, हेड कॉन्स्टेबल ४०२ राऊळ आदींनी कारवाईत सहभाग घेतला.
सावंतवाडी शहर व परिसरात अवैध दारूविक्रीविरोधात पोलिसांकडून कारवाई सुरू असून, चोरट्या पद्धतीने दारू विक्री करणाऱ्यांवर पोलिसांची करडी नजर असल्याचे या कारवाईतून स्पष्ट झाले आहे.
