सावंतवाडी : कर्तव्यनिष्ठेचा ध्यास, प्रामाणिक सेवेची अखंड साधना आणि खाकी वर्दीशी इमान राखत जनसेवेचा वसा जपणाऱ्या ओटवणे गावच्या सुपुत्राने आपल्या कर्तृत्वाचा सुवर्णध्वज उंचावला आहे. ओटवणे गावचे सुपुत्र तथा मुंबईतील कांदिवली उत्तर नियंत्रण कक्ष विभागात कार्यरत असलेले पोलीस उपनिरीक्षक प्रकाश महादेव परब यांना त्यांच्या ३६ वर्षांच्या उत्कृष्ट, प्रामाणिक आणि गुणवत्तापूर्ण सेवेसाठी प्रतिष्ठेचे राष्ट्रपती पोलीस पदक प्रदान करण्यात आले. महाराष्ट्राचे राज्यपाल जिष्णू देव वर्मा यांच्या हस्ते शुक्रवारी सायंकाळी महाराष्ट्र लोकभवनात हा सन्मान सोहळा पार पडला. या गौरवामुळे ओटवणे गावाच्या शिरपेचात मानाचा आणखी एक तुरा खोवला गेला असून, सिंधुदुर्गच्या भूमीचा गौरव मुंबईच्या महानगरीत उजळून निघाला आहे.
पोलिस दलातील उल्लेखनीय, गुणवत्तापूर्ण सेवा आणि शौर्यपूर्ण कामगिरीची दखल घेत दरवर्षी प्रजासत्ताक दिन व स्वातंत्र्यदिनाच्या निमित्ताने विविध पोलीस पदके जाहीर केली जातात. केंद्रीय गृह मंत्रालयाच्या माध्यमातून जाहीर झालेल्या या सन्मानांमध्ये पोलीस उपनिरीक्षक प्रकाश परब यांच्या प्रदीर्घ आणि उल्लेखनीय सेवेची विशेष दखल घेण्यात आली होती. त्यांच्या नावाची मोहोर असलेले पदक आणि प्रशस्तिपत्रक राज्यपालांच्या हस्ते प्रदान करण्यात आले. हा केवळ एका पोलीस अधिकाऱ्याचा गौरव नसून, तीन दशकांहून अधिक काळ कर्तव्याला सर्वोच्च प्राधान्य देणाऱ्या सेवाव्रती व्यक्तिमत्त्वाच्या समर्पणाचा सन्मान आहे.
वडिलांचा वारसा जपत खाकी वर्दीशी इमान!
प्रकाश परब यांचे संपूर्ण शिक्षण मुंबईत झाले. त्यांचे वडीलही पोलीस खात्यात हवालदार म्हणून कार्यरत होते. वडिलांकडून मिळालेला शिस्तीचा संस्कार, कर्तव्यनिष्ठेची शिकवण आणि जनसेवेचा आदर्श त्यांनी आपल्या आयुष्यात आत्मसात केला. याच प्रेरणेतून १९८८ मध्ये ते महाराष्ट्र पोलीस दलाच्या मुंबई विभागात दाखल झाले. त्यानंतर तब्बल ३६ वर्षांच्या सेवाकाळात त्यांनी विविध पोलीस ठाण्यांमध्ये आणि विभागांमध्ये जबाबदारीने काम करत आपल्या कार्यक्षमतेचा ठसा उमटवला.
दादर, येलो गेट, कुर्ला, बोरिवली, चुनाभट्टी, गोरेगाव, कस्तुरबा मार्ग, एमएचबी कॉलनी तसेच नायगाव येथील सशस्त्र पोलीस विभाग अशा विविध ठिकाणी त्यांनी सेवा बजावली. प्रत्येक ठिकाणी अनुभवाची शिदोरी समृद्ध करत, शिस्त आणि कर्तव्यपरायणतेच्या बळावर त्यांनी पोलीस सेवेतील आपला प्रवास यशस्वीपणे पुढे नेला. त्यांच्या प्रदीर्घ सेवेला मिळालेली राष्ट्रपती पोलीस पदकाची मान्यता ही त्यांच्या कर्तृत्वावर उमटलेली गौरवाची सुवर्णमुद्रा ठरली आहे.
गावाशी नाळ कायम; सामाजिक कार्यातही सक्रिय सहभाग!
मुंबईच्या धकाधकीच्या जीवनात कार्यरत असतानाही प्रकाश परब यांनी आपल्या मातृभूमीशी असलेली नाळ कधीही तुटू दिली नाही. ओटवणे गावातील धार्मिक आणि सामाजिक कार्यक्रमांमध्ये त्यांचा सक्रिय सहभाग असतो. मुंबईस्थित ओटवणे ग्रामस्थ मंडळाचेही ते सक्रिय कार्यकर्ते आहेत. व्यावसायिक जबाबदाऱ्या सांभाळतानाच गावाशी असलेले जिव्हाळ्याचे नाते जपणारे त्यांचे व्यक्तिमत्त्व ग्रामस्थांसाठी प्रेरणादायी आहे.
एका बाजूला खाकी वर्दीतील कर्तव्याची कठोर शिस्त आणि दुसऱ्या बाजूला गावच्या मातीशी असलेली भावनिक बांधिलकी, या दोन्हींचा सुंदर संगम त्यांच्या व्यक्तिमत्त्वात दिसून येतो. त्यामुळेच त्यांच्या या राष्ट्रीय स्तरावरील गौरवाकडे केवळ वैयक्तिक यश म्हणून नव्हे, तर ओटवणे गावाच्या सामाजिक आणि सांस्कृतिक अभिमानाची उंची वाढवणारी घटना म्हणून पाहिले जात आहे.
मान्यवरांच्या उपस्थितीत पदक वितरण सोहळा
या सोहळ्यात विविध श्रेणींतील शौर्य पदक, राष्ट्रपती पोलीस पदक आणि पोलीस पदक प्राप्त अधिकारी व अंमलदारांचा गौरव करण्यात आला. यामध्ये मीरा-भाईंदर-वसई-विरारचे पोलीस आयुक्त निकेत कौशिक, पिंपरी-चिंचवडचे पोलीस आयुक्त विनयकुमार चौबे, अतिरिक्त पोलीस महासंचालक प्रवीण साळुंके, मधुकर पांडे, विशेष पोलीस महानिरीक्षक प्रवीणकुमार पडवळ आणि निथीश मिश्रा यांच्यासह एकूण १०३ पोलीस अधिकारी व अंमलदारांचा समावेश होता.
कार्यक्रमाला गृह राज्यमंत्री (ग्रामीण) डॉ. पंकज भोयर, गृह विभागाच्या अतिरिक्त मुख्य सचिव मनीषा म्हैसकर, पोलीस महासंचालक सदानंद दाते, अतिरिक्त पोलीस महासंचालक (एटीएस) नवल बजाज यांच्यासह वरिष्ठ पोलीस अधिकारी आणि पदकप्राप्त मान्यवरांचे कुटुंबीय उपस्थित होते.
३६ वर्षांच्या सेवेचा सन्मान; ओटवणेकरांच्या आनंदाला उधाण!
राष्ट्रपती पोलीस पदक हा केवळ धातूचा सन्मान नसून, वर्षानुवर्षे जोपासलेल्या कर्तव्यनिष्ठेची, प्रामाणिकपणाची आणि समर्पणाची राष्ट्रीय पातळीवर उमटलेली पावती आहे. प्रकाश परब यांच्या या यशाने ओटवणे गावातील नागरिकांसह सिंधुदुर्ग जिल्ह्याच्या शिरपेचातही मानाचा तुरा रोवला गेला आहे.
खाकी वर्दीतील कर्तव्यनिष्ठेला राष्ट्रपती पदकाची मोहोर, ३६ वर्षांच्या सेवेला राष्ट्रीय सन्मानाची जोड आणि ओटवणेच्या सुपुत्राच्या कर्तृत्वाला गौरवाचा मुजरा! प्रकाश परब यांच्या या उल्लेखनीय यशाबद्दल त्यांच्यावर अभिनंदनाचा वर्षाव होत असून, त्यांच्या कामगिरीमुळे नव्या पिढीतील तरुणांनाही प्रामाणिकपणे कर्तव्य बजावण्याची आणि आपल्या कार्यातून गावाचे नाव उज्ज्वल करण्याची प्रेरणा मिळणार आहे.
