सावंतवाडी : गावाच्या विकासाच्या वाटचालीत सहकार हा आर्थिक कणा मानला जातो. याच सहकाराच्या बळावर वेट्ये गावाने उभारलेली विविध कार्यकारी सहकारी सेवा सोसायटीची नूतन वास्तू आज गावाच्या आर्थिक प्रगतीच्या नव्या पर्वाची साक्षीदार ठरली. सभासदांच्या अथक परिश्रमातून आणि संस्थेच्या पदाधिकाऱ्यांच्या सातत्यपूर्ण प्रयत्नांतून साकारलेल्या या वास्तूचा उद्घाटन सोहळा उत्साहपूर्ण वातावरणात संपन्न झाला. स्वतःच्या मालकीची वास्तू उभी राहणे हा संस्थेच्या वाटचालीतील अत्यंत महत्त्वाचा आणि अभिमानाचा क्षण असल्याचे प्रतिपादन सिंधुदुर्ग जिल्हा मध्यवर्ती सहकारी बँकेचे अध्यक्ष मनीष दळवी यांनी केले.
“गावाच्या आर्थिक सुबत्तेसाठी विकास संस्था महत्त्वाची आहे. संस्थेची स्वतःच्या मालकीची वास्तू आज उभी राहिली, हा क्षण निश्चितच ऐतिहासिक आहे. पुढील वाटचालीत सिंधुदुर्ग जिल्हा बँक संस्थेच्या पाठीशी खंबीरपणे उभी राहील. संस्थेला शून्य टक्के व्याजदराने आर्थिक मदत करण्याबरोबरच डिजिटल प्रणालीचा प्रभावी वापर करण्यासाठीही आवश्यक ते सर्व सहकार्य केले जाईल,” अशी ग्वाही दळवी यांनी दिली.
वेत्ये विविध कार्यकारी सहकारी सेवा सोसायटीच्या नूतन वास्तूचा उद्घाटन सोहळा मंगळवारी (८ सप्टेंबर) सकाळी १०.३० वाजता आयोजित करण्यात आला होता. यावेळी अध्यक्षस्थानावरून बोलताना मनीष दळवी म्हणाले, “वेत्ये गावाच्या इतिहासातील आजचा दिवस सुवर्णाक्षरांनी नोंदवावा असा आहे. गावाच्या विकासाचे आर्थिक केंद्र म्हणून विविध कार्यकारी सहकारी संस्था अत्यंत महत्त्वाची भूमिका बजावते. सर्व सभासदांच्या अथक मेहनतीतून ही संस्था मोठी झाली आहे. अडचणीच्या काळातही रमेश गावकर आणि सर्व सभासदांनी संस्थेची घडी मजबूत ठेवत तिला नावारूपास आणले.”
नूतन वास्तूमुळे संस्थेच्या प्रशासकीय कामकाजाला अधिक गती मिळण्याबरोबरच सभासद, शेतकरी आणि ग्रामस्थांना विविध सहकारी सेवा अधिक सुलभ व सक्षम पद्धतीने उपलब्ध होणार आहेत. त्यामुळे ही वास्तू केवळ विटा-मातीची इमारत नसून वेट्येच्या सहकार चळवळीला नवी दिशा देणारे आर्थिक केंद्र ठरणार आहे.
यावेळी जिल्हा परिषद सिंधुदुर्गचे अध्यक्ष प्रमोद कामत यांनी संस्थेच्या कार्याचा गौरव करताना, नूतन वास्तू ही गावच्या सहकार चळवळीच्या पुढील वाटचालीचे नवे केंद्र ठरेल, असा विश्वास व्यक्त केला. सभासदांच्या एकजुटीने आणि पदाधिकाऱ्यांच्या प्रयत्नांनी संस्थेने साधलेली ही प्रगती कौतुकास्पद असल्याचे त्यांनी नमूद केले.
उद्घाटन सोहळ्यास जिल्हा परिषद सदस्य विक्रांत सावंत, सावंतवाडी पंचायत समितीच्या सभापती सुस्मिता जाधव, जिल्हा बँक संचालक रवींद्र मडगावकर, विद्याधर परब, पंचायत समिती सदस्य जितेंद्र गावकर, खरेदी-विक्री संघाचे अध्यक्ष प्रमोद गावडे, सरपंच गुणाजी गावडे, संस्थेचे अध्यक्ष रमेश गावकर यांच्यासह विविध क्षेत्रातील मान्यवरांची प्रमुख उपस्थिती होती.
उद्घाटन सोहळ्याच्या पार्श्वभूमीवर सकाळी ८ वाजता श्री गणेश पूजन व सत्यनारायण महापूजेचे आयोजन करण्यात आले होते. धार्मिक विधीनंतर मान्यवरांच्या उपस्थितीत नूतन वास्तूचे उद्घाटन करण्यात आले. यावेळी सहकार क्षेत्रातील पदाधिकारी, लोकप्रतिनिधी, अधिकारी, संस्थेचे सभासद, हितचिंतक आणि ग्रामस्थ मोठ्या संख्येने उपस्थित होते.
संस्थेचे अध्यक्ष रमेश यशवंत गावकर, उपाध्यक्ष यशवंत दत्तात्रय गावकर, गटसचिव अर्जुन वासुदेव गावकर तसेच संचालक मंडळाने कार्यक्रमाच्या यशस्वी आयोजनासाठी विशेष मेहनत घेतली.
सभासदांच्या श्रमातून उभे राहिले ‘सहकाराचे मंदिर’!
वेट्ये विविध कार्यकारी सहकारी सेवा सोसायटीच्या नूतन वास्तूचे लोकार्पण हा केवळ एका इमारतीचा उद्घाटन सोहळा नसून सभासदांच्या विश्वासाचा, एकजुटीचा आणि अथक परिश्रमांचा विजय आहे. त्यामुळे वेट्येच्या सहकार वाटचालीतील हा दिवस आगामी विकासाची नांदी ठरला असून, नूतन वास्तुतून गावच्या आर्थिक प्रगतीला नवी भरारी मिळण्याची अपेक्षा व्यक्त होत आहे.
