सावंतवाडी : मातीला आकार देताना त्यात केवळ मूर्ती नव्हे, तर भक्ती, श्रद्धा आणि संस्कृतीचे भावविश्व साकार करणारे ज्येष्ठ मूर्तिकार विलास रामभाऊ मांजरेकर यांना यंदाचा प्रतिष्ठेचा ‘कोकणरत्न’ पुरस्कार प्राप्त झाल्याबद्दल सार्वजनिक गणेशोत्सव मंडळातर्फे भावपूर्ण सत्कार करण्यात आला. त्यांच्या दीर्घकाळच्या कलासाधनेचा आणि कोकणच्या पारंपरिक मूर्तिकलेच्या संवर्धनातील योगदानाचा गौरव करणारा हा सोहळा उत्साहपूर्ण वातावरणात पार पडला.
गणेशोत्सव हा केवळ धार्मिक उत्सव नसून कोकणच्या लोकजीवनाशी, कला-संस्कृतीशी आणि सामाजिक एकोप्याशी जोडलेली समृद्ध परंपरा आहे. या उत्सवाला कलात्मक सौंदर्याची किनार देणाऱ्या मूर्तिकारांचे योगदान तितकेच महत्त्वाचे आहे. मांजरेकर यांनी आपल्या कलेच्या माध्यमातून अनेक वर्षे या परंपरेला समृद्ध केले असून, त्यांच्या कलेतील बारकावे, मूर्ती घडविण्यामागील कल्पकता आणि पारंपरिकतेची जपणूक यामुळे त्यांच्या कार्याला विशेष मान्यता मिळाली आहे. त्यामुळे ‘कोकणरत्न’ पुरस्कार हा त्यांच्या वैयक्तिक यशाबरोबरच कोकणातील पारंपरिक कलाविश्वाचा गौरव मानला जात आहे.
याच पार्श्वभूमीवर सार्वजनिक गणेशोत्सव मंडळाने पुढाकार घेत मांजरेकर यांचा सन्मान केला. कलेचा सन्मान म्हणजे संस्कृतीच्या मुळांचा सन्मान, या भावनेतून करण्यात आलेल्या या सत्कारामुळे उपस्थितांमध्येही आनंदाचे वातावरण निर्माण झाले.
यावेळी मंडळाचे उपाध्यक्ष अमरनाथ सावंत, नगरसेवक प्रतीक बांदेकर, उत्सव कमिटी अध्यक्ष राजूभाट, तसेच संदेश नेवगी, संकेत नेवगी, अमेय महाजन बांदेकर, संतोष खानविलकर, प्रसाद नार्वेकर, हृषीकेश स्वार, दत्तप्रसाद नाटेकर, अभय नेवगी, क्रिश सावंत, बाळा सावंत आदी मंडळाचे पदाधिकारी, कार्यकर्ते व गणेशभक्त उपस्थित होते.
परंपरेला आधुनिकतेची जोड देणाऱ्या कलाकाराचा सन्मान
आजच्या बदलत्या काळात पारंपरिक मूर्तिकलेसमोर अनेक आव्हाने उभी आहेत. अशा परिस्थितीत अनेक वर्षे आपल्या कलेशी निष्ठा राखत तिची परंपरा पुढे नेणाऱ्या कलाकारांचा सन्मान होणे ही समाजासाठी सकारात्मक बाब आहे. मांजरेकर यांना मिळालेला ‘कोकणरत्न’ पुरस्कार आणि सार्वजनिक गणेशोत्सव मंडळाने केलेला सत्कार हा नव्या पिढीतील कलाकारांना प्रेरणा देणारा आणि स्थानिक कलेला प्रोत्साहन देणारा उपक्रम ठरला.
गणरायाच्या चरणी अर्पण होणाऱ्या मूर्तीला आकार देणाऱ्या हातांचा सन्मान झाला; आणि त्यातून कोकणच्या कला-परंपरेला पुन्हा एकदा मानाचा मुजरा मिळाला!
