सावंतवाडी : आयुष्याच्या कठीण वळणावर जेव्हा उपचारांची धडपड सुरू असते, तेव्हा मदतीचा एक छोटासा हातही रुग्ण आणि कुटुंबीयांसाठी मोठा आधार ठरतो. याच माणुसकीच्या भावनेतून तळवडे येथील रहिवासी शामसुंदर मालवणकर यांच्या उपचारासाठी भाजपाचे युवा नेते विशाल परब यांनी आर्थिक मदतीचा हात पुढे केला.
शामसुंदर मालवणकर हे किडनीच्या आजाराने त्रस्त असून, सध्या मुंबई येथील जसलोक हॉस्पिटलमध्ये उपचार घेत आहेत. त्यांच्या उपचारासाठी मोठ्या आर्थिक खर्चाची आवश्यकता असताना त्यांच्या अडचणीच्या काळात विशालजी परब यांच्या वतीने आर्थिक मदत देण्यात आली.
भाजपा प्रदेशाध्यक्ष रवींद्र चव्हाण यांच्या वाढदिवसानिमित्त ‘एक मदतीचा हात’ या सामाजिक उपक्रमाच्या माध्यमातून ही मदत करण्यात आली. वाढदिवसाच्या निमित्ताने केवळ शुभेच्छांचा वर्षाव न करता, गरजू व्यक्तीच्या आयुष्यात आशेचा किरण निर्माण करण्याचा हा प्रयत्न ठरला.
राजकारणापलीकडे माणुसकी, उत्सवापलीकडे सामाजिक बांधिलकी आणि शुभेच्छांपलीकडे प्रत्यक्ष मदतीची भावना या उपक्रमातून अधोरेखित झाली. संकटाच्या काळात गरजूंच्या पाठीशी उभे राहण्याची ही भूमिका परिसरात कौतुकाचा विषय ठरत आहे.
यावेळी भाजपाचे ज्येष्ठ कार्यकर्ते दादा आगरवाडेकर, सुभाष कुंभार, तळवडे गावचे उपसरपंच गौरव मेस्त्री तसेच सामाजिक कार्यकर्ते बाळा जाधव उपस्थित होते.
दरम्यान, ‘मदत ही केवळ आर्थिक नसते, तर ती संकटात सापडलेल्या माणसाला दिलेली आश्वासक साथ असते,’ या भावनेची प्रचिती या उपक्रमातून आली. रुग्णाच्या उपचारासाठी मदतीचा हात पुढे करत विशालजी परब यांनी सामाजिक बांधिलकी जपण्याचा संदेश दिला आहे.
