जालना (प्रतिनिधी) : अपुऱ्या पावसामुळे तलावातील पाणीसाठा घटला आणि त्याचा थेट फटका मत्स्यव्यवसायाला बसला. मत्स्यव्यवसाय व बंदरे मंत्री नितेश राणे यांनी बदनापूर तालुक्यातील सोमठाणा तलावाची प्रत्यक्ष पाहणी करत नुकसानग्रस्त मच्छीमारांशी संवाद साधला. यावेळी त्यांनी मच्छीमारांच्या अडचणी जाणून घेत संबंधित अधिकाऱ्यांना आवश्यक कार्यवाहीच्या सूचना दिल्या. यावेळी जालना जिल्ह्याच्या पालकमंत्री पंकजा मुंडे आणि बदनापूरचे आमदार नारायण कुचे उपस्थित होते.
मत्स्यउत्पादनात मोठी घट –
यंदा अपुऱ्या पावसामुळे सोमठाणा तलावातील पाण्याची पातळी मोठ्या प्रमाणात खालावली आहे. परिणामी तलावातील मत्स्यव्यवसायावर गंभीर परिणाम झाला असून, गेल्या वर्षीच्या ७९ टक्के मत्स्यउत्पादनाच्या तुलनेत यंदा उत्पादन केवळ २० टक्क्यांपर्यंत घसरल्याचे यावेळी सांगण्यात आले. त्यामुळे मच्छीमार बांधवांसमोर आर्थिक अडचणी निर्माण झाल्या आहेत.
मंत्री नितेश राणे यांनी तलाव परिसराची पाहणी करून मच्छीमारांशी थेट संवाद साधला. त्यांच्या अडचणी, झालेले नुकसान आणि मत्स्यव्यवसायासमोरील आव्हाने याबाबत त्यांनी माहिती घेतली.
‘नुकसानग्रस्त मच्छीमारांचे पंचनामे करा’
तलावातील गाळ काढण्याच्या कामासाठी आवश्यक ती कार्यवाही तातडीने सुरू करण्याच्या सूचना मंत्री राणे यांनी संबंधित अधिकाऱ्यांना दिल्या. तसेच नुकसानग्रस्त मच्छीमारांचे पंचनामे करून त्यांना शासनाच्या माध्यमातून आवश्यक मदत मिळवून देण्यासाठी लवकरात लवकर कार्यवाही करण्याचे निर्देश त्यांनी दिले.
महाराष्ट्राच्या मत्स्यव्यवसाय विभागाकडे तलाव व जलाशयांमधील भूजल मत्स्यव्यवसायासाठी स्वतंत्र धोरणे व योजना आहेत. राज्यातील मोठ्या संख्येने तलाव-जलाशयांमधून स्थानिक मच्छीमार संस्थांच्या माध्यमातून मत्स्यव्यवसाय केला जातो.
शासकीय योजनांचा लाभ घेण्याचे आवाहन –
मच्छीमारांचे उत्पन्न वाढविणे आणि मत्स्यव्यवसायाला अधिक चालना देण्यासाठी शासनाच्या ‘मुख्यमंत्री मत्स्यसंपदा योजना’ यासह उपलब्ध योजनांचा लाभ घेण्याचे आवाहन यावेळी करण्यात आले. मत्स्यव्यवसाय विभागाच्या संकेतस्थळावर मुख्यमंत्री मत्स्यसंपदा योजनेसंदर्भातील २०२६ मधील शासन निर्णयही उपलब्ध आहे.
तलावातील मत्स्यव्यवसाय अधिक सक्षम करण्यासाठी पाणीसाठा, गाळ काढणे, मत्स्यसंवर्धन आणि शासकीय योजनांचा प्रभावी वापर यावर भर देण्याची गरज यावेळी अधोरेखित झाली.
यावेळी मत्स्य आयुक्त भानुदास पालवे, सहाय्यक आयुक्त (भूजल) ऋता दीक्षित, प्रादेशिक आयुक्त, छत्रपती संभाजीनगर सुरेश भारती, सहाय्यक आयुक्त माधुरिमा जाधव यांच्यासह मत्स्यव्यवसाय व पाटबंधारे विभागातील अधिकारी उपस्थित होते.
