आचरा : दमदार सर्व्हिसचा वेग, आक्रमक स्मॅशचा प्रहार, चपळ बचावाची कमाल आणि प्रत्येक गुणासाठी जीवाचे रान करणाऱ्या खेळाडूंचा जोश… अशा क्रीडारसाने भारलेल्या वातावरणात मालवण तालुकास्तरीय शालेय शासकीय व्हॉलीबॉल स्पर्धांचा थरार जनता विद्या मंदिर, त्रिंबक प्रशालेच्या मैदानावर रंगला. तालुक्यातील सुमारे २० शाळांच्या संघांनी सहभाग नोंदविलेल्या या स्पर्धेत विद्यार्थ्यांनी आपल्या कौशल्याचा, सांघिक एकजुटीचा आणि जिद्दीचा प्रत्यय घडवून आणला. तीन गटांतील विजेत्या संघांनी प्रतिस्पर्ध्यांवर मात करत जिल्हास्तरीय स्पर्धेचे तिकीट निश्चित केले.
मालवण तालुकास्तरीय शालेय शासकीय व्हॉलीबॉल स्पर्धा गुरुवारी, २ ऑक्टोबर रोजी जनता विद्या मंदिर, त्रिंबक प्रशालेच्या मैदानावर उत्साहपूर्ण वातावरणात पार पडल्या. मैदानावरील प्रत्येक चेंडूसोबत वाढणारा उत्कंठेचा क्षण, गुण मिळविल्यानंतर खेळाडूंनी केलेला जल्लोष आणि विजयासाठी सहकाऱ्यांना दिलेली प्रेरणा यामुळे संपूर्ण क्रीडांगण चैतन्यमय झाले होते.
स्पर्धेचे उद्घाटन माध्यमिक शिक्षण समितीचे अध्यक्ष सुरेंद्र उर्फ अन्ना सकपाळ यांच्या हस्ते करण्यात आले. यावेळी समितीचे कार्यवाह अरविंद घाडी, उपाध्यक्ष अशोक बागवे, शाळा व्यवस्थापन समितीचे अध्यक्ष प्रफुल्ल प्रभू, संचालक डॉ. सुधीर मेहेंदळे, एकनाथ घाडीगांवकर, संजय सामंत, राजू त्रिंबककर, सच्चिदानंद भोगटे, प्रशालेचे मुख्याध्यापक प्रवीण घाडीगावकर, क्रीडा समन्वयक संजय पेंडुरकर यांच्यासह मालवण तालुक्यातील क्रीडा शिक्षक मोठ्या संख्येने उपस्थित होते.
या स्पर्धेत १४ वर्षांखालील मुली, १४ वर्षांखालील मुले आणि १९ वर्षांखालील मुले अशा तीन गटांत चुरशीचे सामने रंगले. प्रत्येक संघाने विजयासाठी कौशल्य, शिस्त आणि सांघिक समन्वय यांचा सुरेख मिलाफ साधत प्रतिस्पर्ध्यांना कडवी झुंज दिली.
विजयी संघांची जिल्हास्तरावर आगेकूच!
१४ वर्षांखालील मुलींच्या गटात यजमान जनता विद्या मंदिर, त्रिंबक संघाने दमदार खेळाचे प्रदर्शन करत प्रथम क्रमांक पटकावला. १४ वर्षांखालील मुलांच्या गटात टोपीवाला हायस्कूल, मालवण संघाने विजेतेपदावर आपले नाव कोरले. तर १९ वर्षांखालील मुलांच्या गटात इंग्लिश मीडियम स्कूल, कट्टा संघाने प्रतिस्पर्ध्यांवर मात करत प्रथम क्रमांक मिळविला.
या तिन्ही विजेत्या संघांची जिल्हास्तरीय स्पर्धेसाठी निवड झाली असून, आता जिल्हास्तरावर मालवण तालुक्याचा क्रीडाध्वज उंचावण्याची जबाबदारी या संघांवर असेल. तालुकास्तरीय स्पर्धेतील यशामुळे खेळाडूंच्या आत्मविश्वासाला नवी झेप मिळाली असून, त्यांच्या पुढील वाटचालीकडे क्रीडाप्रेमींचे लक्ष लागले आहे.
स्पर्धेतील पंच म्हणून अमित हर्डीकर, महेंद्र वारंग, श्यामसुंदर वारंग, संतोष तावडे आणि निशिकांत पराडकर यांनी काम पाहिले. क्रीडा शिक्षक महेंद्र वारंग यांनी उपस्थित मान्यवरांचे स्वागत केले.
स्पर्धा यशस्वीरीत्या पार पाडण्यासाठी जनता विद्या मंदिर, त्रिंबक प्रशालेतील शिक्षक, क्रीडा शिक्षक, शिक्षकेतर कर्मचारी आणि विद्यार्थ्यांनी विशेष परिश्रम घेतले. या स्पर्धेच्या निमित्ताने विद्यार्थ्यांमधील सुप्त क्रीडागुणांना व्यासपीठ मिळाले, तर सांघिक भावना, खिलाडूवृत्ती आणि विजयासाठीची जिद्द यांचे प्रेरणादायी दर्शनही घडले.
त्रिंबक, टोपीवाला आणि कट्टा या तीनही विजेत्या संघांच्या जिल्हास्तरीय वाटचालीसाठी सर्व स्तरांतून अभिनंदनाचा वर्षाव होत असून, आता जिल्ह्याच्या मैदानावरही हे संघ विजयाची नवी गाथा लिहिण्यास सज्ज झाले आहेत!
