वेंगुर्ला : खानोली नगरीत रंगलेला पौराणिक नाट्य महोत्सव जणू संस्कृतीचा सोहळाच ठरला. पारंपरिकतेचा साज, उत्साहाची लय आणि कलेप्रती असलेली निष्ठा यांचा संगम साधत हा उद्घाटन सोहळा अत्यंत दिमाखात आणि जल्लोषात पार पडला. संपूर्ण गावात सणासारखे वातावरण निर्माण झाले होते, तर नाट्यप्रेमी व कला रसिकांनी मोठ्या संख्येने उपस्थित राहून या महोत्सवाला उत्स्फूर्त प्रतिसाद दिला.
या उद्घाटन सोहळ्यास प्रमुख मान्यवर म्हणून युवा नेते विशाल परब, प्रसंन्ना उर्फ बाळू देसाई, साईप्रसाद नाईक, शरद चव्हाण, सुनिल मयेकर, संतोष सनगरे आणि बुवा भालचंद्र केळुसकर तसेच सरपंच सुभाष खानोलकर उपस्थित होते. मान्यवरांच्या हस्ते पारंपरिक पद्धतीने दीपप्रज्वलन करून महोत्सवाचे उद्घाटन करण्यात आले. त्यानंतर सर्व मान्यवरांचा शाल, श्रीफळ व पुष्पगुच्छ देऊन सन्मानपूर्वक सत्कार करण्यात आला.
यावेळी मान्यवरांनी आपल्या मनोगतातून पौराणिक नाट्यकलेचे सांस्कृतिक आणि ऐतिहासिक महत्त्व प्रभावी शब्दांत अधोरेखित केले. “दशावतार आणि पौराणिक नाट्य ही आपली समृद्ध परंपरा आहे. अशा महोत्सवांमुळे ही कला जिवंत राहते आणि नव्या पिढीपर्यंत पोहोचते,” असे मत व्यक्त करत त्यांनी या उपक्रमाचे मनापासून कौतुक केले. ग्रामीण भागात अशा सांस्कृतिक उपक्रमांचे आयोजन होणे ही अभिमानाची बाब असल्याचेही त्यांनी नमूद केले.
उद्घाटनानंतर सादर करण्यात आलेल्या पौराणिक नाट्यप्रयोगांनी प्रेक्षकांना अक्षरशः मंत्रमुग्ध केले. कलाकारांच्या दमदार अभिनयाने, नेत्रदीपक वेशभूषेने, प्रभावी नेपथ्याने आणि सुरेल पार्श्वसंगीताने नाटकांना रंगत आली. प्रत्येक प्रसंगावर प्रेक्षकांनी टाळ्यांचा कडकडाट करत कलाकारांच्या कलेला भरभरून दाद दिली.
या महोत्सवाच्या यशस्वी आयोजनासाठी स्थानिक ग्रामस्थ, युवक मंडळे आणि कला प्रेमींनी घेतलेले परिश्रम कौतुकास्पद ठरले. संपूर्ण परिसरात शिस्तबद्ध आणि सुबक व्यवस्था करण्यात आली होती. येत्या काही दिवसांत विविध पौराणिक कथांवर आधारित नाट्यप्रयोग सादर होणार असल्याने खानोलीत सांस्कृतिक मेजवानीची पर्वणीच लाभणार आहे.
हा महोत्सव स्थानिक कलाकारांना व्यासपीठ उपलब्ध करून देण्याबरोबरच पारंपरिक लोककलेच्या जतन आणि संवर्धनासाठी महत्त्वपूर्ण ठरणार असल्याची भावना यावेळी विशाल परब यांनी व्यक्त केली. “आपण प्रत्येक वेळी कलाकारांच्या आणि अशा उपक्रमांच्या पाठीशी ठामपणे उभे आहोत,” अशी ग्वाहीही त्यांनी दिली.
कार्यक्रमाचे सुत्रसंचलन प्रा. वैभव खानोलकर यांनी प्रभावी शैलीत केले. यावेळी अण्णा खानोलकर, विद्याधर प्रभु, मनोहर खानोलकर यांसह अनेक मान्यवर आणि ग्रामस्थ मोठ्या संख्येने उपस्थित होते.
