सावंतवाडी : समाजाप्रती असलेली बांधिलकी जपत आणि विद्यार्थ्यांच्या शिक्षणाला प्रोत्साहन देण्याच्या उद्देशाने तालुक्यातील माजगाव येथे सामाजिक कार्यकर्ते बावतीस फर्नांडिस व त्यांच्या कुटुंबियांच्या वतीने विविध शाळांमधील विद्यार्थ्यांना शैक्षणिक साहित्याचे वाटप करण्यात आले. नव्या शैक्षणिक वर्षाच्या प्रारंभी आयोजित करण्यात आलेल्या या उपक्रमामुळे अनेक विद्यार्थ्यांच्या चेहऱ्यावर आनंद फुलला.
या कार्यक्रमात सावंतवाडी नगर परिषदेचे माजी नगराध्यक्ष बबन साळगावकर यांच्या हस्ते विद्यार्थ्यांना शैक्षणिक किटचे वितरण करण्यात आले. वह्या, पेन, पेन्सिल तसेच इतर आवश्यक शालेय साहित्याचा समावेश असलेल्या या किटमुळे विद्यार्थ्यांना शिक्षणासाठी आवश्यक साधने उपलब्ध झाली.
यावेळी उपस्थित मान्यवरांनी विद्यार्थ्यांना मन लावून शिक्षण घेण्याचे आवाहन केले. शिक्षण हेच उज्ज्वल भवितव्य घडविण्याचे प्रभावी माध्यम असल्याचे सांगत अशा सामाजिक उपक्रमांची आजच्या काळात नितांत गरज असल्याचे मत व्यक्त करण्यात आले.
बावतीस फर्नांडिस कुटुंबीय गेल्या अनेक वर्षांपासून विविध सामाजिक उपक्रमांमध्ये सक्रिय सहभाग घेत असून, गरजू घटकांना मदतीचा हात देण्याचे कार्य सातत्याने करत आहेत. विद्यार्थ्यांच्या शैक्षणिक प्रगतीसाठी राबविण्यात आलेल्या या उपक्रमाचे पालक, शिक्षक तसेच ग्रामस्थांकडून विशेष स्वागत करण्यात आले.
विद्यार्थ्यांच्या शिक्षणासाठी दिलेला हा छोटासा हातभार त्यांच्या उज्ज्वल भविष्यासाठी प्रेरणादायी ठरणार असून, बावतीस फर्नांडिस कुटुंबियांच्या या सामाजिक जाणिवेच्या उपक्रमाचे सर्व स्तरांतून कौतुक होत आहे.
