– शिक्षण, समाजकारण आणि माणुसकीचा अखंड वारसा जपणाऱ्या स्व. विकासभाई सावंत यांना विनम्र अभिवादन! ; १५ जुलै रोजी सावंतवाडीत होणार भावपूर्ण स्मरणसोहळा!
सावंतवाडी : काही व्यक्ती काळाच्या पडद्याआड जातात, पण त्यांच्या विचारांचा प्रकाश कधीच मावळत नाही. त्यांचे अस्तित्व नजरेआड होते; मात्र त्यांनी जपलेली माणसे, घडविलेल्या संस्था आणि रुजविलेली मूल्ये समाजाच्या प्रत्येक श्वासात जिवंत राहतात. अशाच कर्तृत्ववान, दूरदृष्टी असलेल्या आणि माणुसकीला जीवनाचे अधिष्ठान मानणाऱ्या स्व. विकासभाई भालचंद्र सावंत यांच्या प्रथम स्मृतिदिनानिमित्त ‘विकासभाई – एक आश्वासक पर्व’ या भावपूर्ण स्मरणसोहळ्याचे आयोजन उद्या बुधवार, दि. १५ जुलै २०२६ रोजी सकाळी १० ते ११.३० या वेळेत नवरंग कलामंच, राणी पार्वतीदेवी हायस्कूल व ज्युनिअर कॉलेज, सावंतवाडी येथे करण्यात आले आहे.
यावेळी शिक्षण प्रसारक मंडळ सावंतवाडीचे अध्यक्ष विक्रांत विकासभाई सावंत यांच्या अध्यक्षतेखाली या कार्यक्रमाचे आयोजन करण्यात आले आहे.
२० जून १९६३ ते १५ जुलै २०२५ हा विकासभाई सावंत यांचा प्रवास केवळ एका व्यक्तीचा जीवनप्रवास नव्हता; तो समाजाशी नाळ जुळलेल्या नेतृत्वाचा, शिक्षणाविषयी अपार आस्था असलेल्या विचारवंताचा, विकासाला समर्पित कार्यकर्त्याचा आणि संकटातही आश्वासकपणे पाठीशी उभे राहणाऱ्या माणुसकीच्या पर्वाचा प्रवास होता. म्हणूनच “विकासभाई – एक आश्वासक पर्व” ही संकल्पना त्यांच्या संपूर्ण जीवनकार्याचा सारांश ठरते.
शिक्षण, राजकारण, अर्थकारण आणि समाजकारण या सर्वच क्षेत्रांत त्यांनी आपल्या कार्याचा अमीट ठसा उमटवला. कोणतेही पद असो किंवा जबाबदारी, त्यांच्या प्रत्येक निर्णयाच्या केंद्रस्थानी ‘माणूस’ हा एकच विचार होता. सर्वसामान्यांच्या अडचणी समजून घेणे, गरजूंना मदतीचा हात देणे, संस्थांच्या प्रगतीसाठी दूरदृष्टीने निर्णय घेणे आणि प्रत्येकाशी आत्मीयतेचे नाते जोडणे, हीच त्यांच्या व्यक्तिमत्त्वाची खरी ओळख बनली.
त्यांच्या निधनाला एक वर्ष पूर्ण होत असले, तरी त्यांच्या स्मृतींचा सुगंध आजही असंख्य हृदयांत दरवळत आहे. कुणासाठी ते मार्गदर्शक, कुणासाठी आधारवड, कुणासाठी प्रेरणास्थान, तर अनेकांसाठी संकटसमयी निस्वार्थपणे धावून येणारे विश्वासाचे दुसरे नाव होते. त्यामुळे हा स्मरणसोहळा केवळ श्रद्धांजलीचा कार्यक्रम नसून, त्यांच्या विचारांना नव्या पिढीशी जोडणारा आणि त्यांच्या कार्याचा वारसा पुढे नेण्याचा एक प्रेरणादायी संकल्प आहे.
या स्मरणसोहळ्यास शिक्षण प्रसारक मंडळ, सावंतवाडीचे उपाध्यक्ष डॉ. दिनेश नागवेकर, सचिव व्ही. बी. नाईक, खजिनदार सी. एल. नाईक, शालेय समिती अध्यक्ष अमोल सावंत, तसेच संस्थेचे सदस्य प्रा. सतीश बागवे, संदीप राणे, चंद्रकांत सावंत, वसुधा मुळीक, छाया सावंत आणि स्नेहा परब यांची प्रमुख उपस्थिती लाभणार आहे.
याशिवाय संस्थेचे आजी-माजी मुख्याध्यापक, उपमुख्याध्यापक, उपप्राचार्य, पर्यवेक्षक, प्राध्यापक, शिक्षक, शिक्षकेतर कर्मचारी, विद्यार्थी, माजी विद्यार्थी तसेच स्व. विकासभाई सावंत यांच्या विचारांशी नाते जपणारे असंख्य हितचिंतक उपस्थित राहणार आहेत. विविध पिढ्यांना एका भावबंधात गुंफणारा हा स्मरणसोहळा त्यांच्या व्यापक लोकसंग्रहाची आणि माणुसकीच्या नात्यांची जिवंत साक्ष ठरणार आहे.
कार्यक्रमाची सुरुवात सकाळी १० वाजता स्व. विकासभाई सावंत यांच्या प्रतिमेस पुष्पांजली अर्पण करून होईल. त्यानंतर मान्यवरांच्या हस्ते बक्षीस वितरण, स्मरणपर मनोगते, अध्यक्षीय भाषण आणि आभार प्रदर्शन असा कार्यक्रमाचा क्रम राहणार आहे.
या स्मरणसोहळ्याच्या माध्यमातून विद्यार्थ्यांमध्ये सामाजिक बांधिलकी, नेतृत्व, सेवाभाव आणि माणुसकीची मूल्ये रुजविण्याचा प्रयत्न केला जाणार आहे. कारण व्यक्ती काळाच्या ओघात दूर जाते; पण तिचे विचार, कार्य आणि संस्कार समाजाला कायम दिशा देत राहतात.
शिक्षण प्रसारक मंडळ, सावंतवाडी संचलित राणी पार्वतीदेवी हायस्कूल व ज्युनिअर कॉलेज यांच्या वतीने आयोजित या भावपूर्ण स्मरणसोहळ्यास उपस्थित राहून स्व. विकासभाई भालचंद्र सावंत यांच्या पावन स्मृतींना विनम्र अभिवादन करावे, असे आवाहन मुख्याध्यापक संप्रवी कशाळीकर, प्रभारी मुख्याध्यापक डॉ. सुमेधा नाईक, प्रभारी उपप्राचार्य सविता माळगे, पर्यवेक्षक नामदेव मुठे तसेच प्राध्यापक, शिक्षक व शिक्षकेतर कर्मचाऱ्यांनी केले आहे.
