सावंतवाडी : सावंतवाडी प्रांत कार्यालयातील नायब तहसीलदार मनोज मुसळे (वय ५५, रा. कणकवली) यांचे आज सकाळी हृदयविकाराच्या तीव्र झटक्याने दुःखद निधन झाले. अचानक प्रकृती अस्वस्थ झाल्यानंतर त्यांना तातडीने सावंतवाडी येथील उपजिल्हा रुग्णालयात उपचारासाठी दाखल करण्यात आले. डॉक्टरांनी शर्थीचे प्रयत्न करूनही उपचार सुरू असतानाच त्यांची प्राणज्योत मालवली. त्यांच्या निधनाच्या वृत्ताने महसूल विभागासह सावंतवाडी आणि कणकवली परिसरात हळहळ व्यक्त होत आहे.
मनोज मुसळे हे कणकवली शहरात वास्तव्यास होते. महसूल विभागातील आपल्या प्रदीर्घ सेवाकाळात त्यांनी कणकवली, वैभववाडी, मालवण, कुडाळ तसेच सावंतवाडी येथील तहसीलदार कार्यालयांमध्ये नायब तहसीलदार म्हणून जबाबदारी पार पाडली. सध्या ते सावंतवाडी प्रांत कार्यालयात नायब तहसीलदार म्हणून कार्यरत होते.
शासकीय सेवेत विविध ठिकाणी जबाबदारी सांभाळताना महसूल प्रशासनातील कामकाजाचा त्यांना प्रदीर्घ अनुभव होता. त्यांच्या अकाली निधनाने एक अनुभवी अधिकारी, सहकारी आणि कर्तव्यनिष्ठ प्रशासकीय व्यक्तिमत्त्व काळाच्या पडद्याआड गेल्याची भावना व्यक्त होत आहे.
- प्रांत कार्यालयावर पुन्हा दुःखाची सावली!
या दुःखद घटनेने सावंतवाडी प्रांत कार्यालयाशी संबंधित आणखी एक धक्कादायक आठवण ताजी झाली आहे. गेल्या काही महिन्यांपूर्वी सावंतवाडीचे प्रांताधिकारी समीर घारे यांनाही ब्रेन स्ट्रोक आला होता. प्रकृती अस्वस्थ झाल्यानंतर त्यांच्यावर उपचार सुरू करण्यात आले असून सध्या ते उपचार घेत आहेत.
त्या धक्क्यातून महसूल विभाग सावरत असतानाच आता नायब तहसीलदार मनोज मुसळे यांच्या अकस्मात निधनाची बातमी समोर आल्याने सहकारी अधिकारी-कर्मचाऱ्यांमध्ये शोककळा पसरली आहे.
सकाळी नेहमीप्रमाणे सुरू झालेला दिवस… आणि काही क्षणांतच आलेली मन हेलावून टाकणारी निधनाची बातमी!
मुसळे यांच्या अचानक जाण्याने त्यांच्या सहकाऱ्यांसह परिचितांवर दुःखाचा डोंगर कोसळला आहे.
जीवनाचा प्रवास किती क्षणभंगुर असतो, याची जाणीव करून देणारी ही दुर्दैवी घटना आहे. कर्तव्याच्या वाटेवर असलेला एक अधिकारी अचानक काळाच्या पडद्याआड निघून गेला आणि मागे राहिल्या त्या त्यांच्या आठवणी, सहकाऱ्यांच्या भावना आणि कुटुंबीयांच्या मनात कायमच्या कोरल्या गेलेल्या त्यांच्या स्मृती…
मनोज मुसळे यांच्या निधनाने महसूल विभागाने एक अनुभवी सहकारी गमावला असून, त्यांच्या कुटुंबीयांच्या दुःखात महसूल विभाग आणि सावंतवाडी परिसर सहभागी आहे.
