सावंतवाडी : कोकणच्या मातीशी आणि गणरायाच्या भक्तीशी अतूट नाते जोडलेल्या श्री गणेशोत्सवाच्या भव्यतेमागे झटणाऱ्या असंख्य सेवाव्रती हातांना यंदा सन्मानाची सलामी मिळाली. गणेशोत्सव भक्तिमय, मंगलमय आणि उत्साहपूर्ण वातावरणात पार पाडण्यासाठी पडद्यामागे राहून निःस्वार्थ योगदान देणाऱ्या विविध क्षेत्रांतील मान्यवरांचा सावंतवाडी नागरी कृती समिती, सिंधुदुर्ग यांच्या वतीने सन्मानचिन्ह देऊन नागरी सत्कार करण्यात आला.
‘श्री गणेशोत्सव २०२६’ निमित्त आयोजित या भावस्पर्शी सन्मान सोहळ्याला महाराष्ट्र भाजपा युवा नेते विशाल परब प्रमुख पाहुणे म्हणून उपस्थित होते. यावेळी उपनगराध्यक्ष अनिल निरवडेकर आणि जिल्हा परिषद सदस्य संदीप गावडे यांचीही विशेष उपस्थिती होती.
गणरायाच्या उत्सवाची शोभा वाढविणाऱ्या गणेश मूर्तिकार, भजनी मंडळांचे कलाकार, गायक, होमगार्ड, सफाई कामगार, डेकोरेटर्स तसेच विविध क्षेत्रांत योगदान देणाऱ्या सेवाव्रतींचा मान्यवरांच्या हस्ते गौरव करण्यात आला. त्यामुळे हा सोहळा केवळ सत्काराचा न राहता कष्ट, कला, सेवा आणि सामाजिक बांधिलकीचा गौरव सोहळा ठरला.
‘उत्सवाच्या झगमगाटामागे असतात असंख्य हातांचे कष्ट!’
यावेळी बोलताना विशाल परब म्हणाले, “गणेशोत्सवाची भव्यता केवळ सजावट, रोषणाई आणि उत्साहात नसते; त्यामागे असंख्य हातांचे कष्ट, भक्ती, कला आणि समर्पण दडलेले असते. मूर्ती घडविणाऱ्या कारागिरापासून ते उत्सवाच्या काळात अहोरात्र सेवा देणाऱ्या सफाई कामगारापर्यंत प्रत्येकाचे योगदान मोलाचे आहे. अशा सेवाव्रतींचा सन्मान करून सावंतवाडी नागरी कृती समितीने त्यांच्या कष्टांना कौतुकाची आणि शाबासकीची थाप दिली आहे.”
“सावंतवाडी ही केवळ ऐतिहासिक आणि सांस्कृतिक नगरी नाही, तर माणुसकी, सामाजिक एकोपा आणि सहकार्याची भूमी आहे. शहराच्या सर्वांगीण विकासासाठी प्रत्येक घटकाने एकमेकांच्या हातात हात घालून, मतभेद बाजूला ठेवून आणि शहरहिताला प्राधान्य देत एकत्र काम करण्याची गरज आहे. सावंतवाडीच्या विकासासाठी आपण सर्वांनी एकजुटीने पुढे येऊया,” असे आवाहनही परब यांनी यावेळी केले.
पडद्यामागील शिलेदार आले प्रकाशझोतात!
गणेशोत्सवाच्या यशस्वी आयोजनासाठी दिवस-रात्र मेहनत घेणाऱ्या सेवाव्रतींचा सन्मान हा उपस्थितांसाठीही भावनिक क्षण ठरला. गणरायाची मूर्ती घडविणारे हात, भक्तीचे सूर छेडणारे कलाकार, उत्सवाची शोभा वाढविणारे डेकोरेटर्स, सुरक्षा व्यवस्था सांभाळणारे होमगार्ड आणि स्वच्छतेची जबाबदारी पेलणारे सफाई कामगार अशा विविध घटकांच्या योगदानाची यावेळी कृतज्ञतेने दखल घेण्यात आली.
यावेळी नगरसेविका दिपाली भालेकर, युवा मोर्चा अध्यक्ष हितेन नाईक, माजी नगरसेविका कीर्ती बोंद्रे, नगरसेवक अजय गोंदावळे, मूर्तिकार संघटनेचे अध्यक्ष बापू सावंत, ज्येष्ठ पत्रकार सिताराम गावडे, माजी नगरसेवक उमाकांत वारंग आणि नगरसेवक देव्या सूर्याजी यांच्यासह विविध क्षेत्रांतील मान्यवर उपस्थित होते.
कार्यक्रमाच्या यशस्वी आयोजनासाठी सावंतवाडी नागरी कृती समितीचे अध्यक्ष माजी नगरसेवक सुनील पेडणेकर, उपाध्यक्ष ॲड. राजू कासकर, सरचिटणीस श्रीपाद सावंत तसेच समितीच्या सर्व पदाधिकारी आणि सदस्यांनी विशेष परिश्रम घेतले.
“कोकण आणि गणेशोत्सवाचे नाते केवळ श्रद्धेचे नाही; ते संस्कृती, कला, परंपरा आणि सामाजिक एकोप्याच्या धाग्यांनी विणलेले आहे. या उत्सवाची मंगलमय ज्योत अखंड तेवत ठेवण्यासाठी अनेक हात निःशब्दपणे झटत असतात. त्या पडद्यामागील खऱ्या शिलेदारांना सन्मानाचे व्यासपीठ देणे म्हणजे त्यांच्या कष्टांना, घामाला आणि सेवाभावाला केलेला मानाचा मुजरा आहे,” अशी भावना यावेळी व्यक्त करण्यात आली.
