सावंतवाडी : ज्ञानाची आस जागवणाऱ्या पुस्तकांच्या सहवासातून विचारांची मशाल पेटवत ठेवणाऱ्या शासनमान्य कै. प्रा. उदय रमाकांत खानोलकर वाचन मंदिर, मळगावचा वर्धापन दिन तसेच संस्थेचे प्रेरणास्थान कै. प्रा. उदय रमाकांत खानोलकर यांचा स्मृतिदिन सोमवार, ५ ऑक्टोबर २०२६ रोजी भक्तिभाव, कृतज्ञता आणि उत्साहपूर्ण वातावरणात संपन्न झाला.
या निमित्ताने वाचन मंदिरात कै. प्रा. उदय खानोलकर यांच्या प्रतिमेस पुष्पहार अर्पण करून भावपूर्ण अभिवादन करण्यात आले. त्यांच्या ज्ञानप्रेमी, वाचनसंस्कृती रुजविणाऱ्या आणि समाजमन घडविणाऱ्या कार्याच्या स्मृतींना यावेळी उजाळा देण्यात आला. तसेच वर्धापन दिनाचे औचित्य साधून विद्येची अधिष्ठात्री सरस्वती मातेच्या मूर्तीस पुष्पहार अर्पण करून ज्ञानोपासनेचा हा प्रवास अधिक जोमाने पुढे नेण्याचा संकल्प करण्यात आला.
याप्रसंगी वाचन मंदिराचे सन्माननीय संचालक श्री. हेमंत खानोलकर, श्री. शांताराम विठ्ठल गवंडे, श्री. चंद्रकांत भोजू जाधव, कार्यवाह सौ. स्नेहा महेश खानोलकर, निवृत्त जिल्हा कामगार अधिकारी श्री. शेखर पाडगावकर, सनदी लेखापाल श्री. श्रीपाद काणेकर तसेच सौ. रंजनाताई काणेकर यांची विशेष उपस्थिती लाभली.
याशिवाय ग्रंथपाल श्री. आनंद देवळी, ग्रंथालय कर्मचारी, असंख्य वाचक, हितचिंतक, देणगीदार आणि सभासद मोठ्या संख्येने उपस्थित होते. त्यांच्या उत्स्फूर्त सहभागामुळे वाचन मंदिराचा हा वर्धापन दिन केवळ औपचारिक सोहळा न ठरता ज्ञान, स्मृती आणि वाचनसंस्कृतीचा सुंदर संगम ठरला.
पुस्तकांच्या पानांतून विचारांची नवी पालवी फुटावी, वाचनातून विवेकाची ज्योत प्रज्वलित व्हावी आणि समाजमन अधिक समृद्ध व्हावे, हीच कै. प्रा. उदय रमाकांत खानोलकर यांच्या कार्याला खरी आदरांजली ठरेल. त्यांनी प्रज्वलित केलेला ज्ञानदीप मळगावच्या मातीतून असाच पिढ्यान्‌पिढ्या तेवत राहो, या सदिच्छेसह कार्यक्रमाची भावपूर्ण सांगता झाली.
