आंबोली : सामाजिक बांधिलकीच्या सेवायज्ञात ज्येष्ठांच्या योगदानाचा सन्मान आणि अनुभवाच्या शिदोरीचा गौरव करणारा सोहळा आंबोली येथे उत्साहात पार पडला. भारतीय जनता पार्टीचे आंबोली येथील ज्येष्ठ मार्गदर्शक विनोद राऊळ यांचा मान्यवरांच्या हस्ते भव्य नागरी सत्कार करण्यात आला. भारतीय जनता पार्टीचे राज्य युवा नेते विशाल परब यांच्या वाढदिवसानिमित्त आयोजित भव्य महाआरोग्य शिबिराच्या उद्घाटनप्रसंगी हा सन्मान सोहळा पार पडला.
समाजजीवनात ज्येष्ठांचे मार्गदर्शन, त्यांचा अनुभव आणि संघटनात्मक कार्यातील योगदान यांना अनन्यसाधारण महत्त्व असते. याच भावनेतून विनोद राऊळ यांना मान्यवरांच्या उपस्थितीत सन्मानित करण्यात आले. या सत्कारामुळे कार्यक्रमाला विशेष महत्त्व प्राप्त झाले. महाआरोग्य शिबिराच्या माध्यमातून आरोग्यसेवेचा संकल्प आणि ज्येष्ठांच्या कार्याचा गौरव, असा सेवाभावाचा दुहेरी संगम यावेळी पाहायला मिळाला.
या सोहळ्याला भारतीय जनता पार्टीचे जिल्हाध्यक्ष प्रभाकर सावंत, सावंतवाडी नगर परिषदेचे उपनगराध्यक्ष ॲड. अनिल निरवडेकर, भाजपचे राज्य युवा नेते विशाल परब, जिल्हा परिषद सदस्य शोभा गावडे, नितीन राऊळ, पंचायत समितीचे उपसभापती गौरव मुळीक, आंबोलीच्या सरपंच सावित्री पालेकर, सरपंच गुलाबराव गावडे, गेळेचे सरपंच सागर ठाकरे आदी मान्यवर उपस्थित होते.
याशिवाय भारतीय जनता पार्टीचे विविध पदाधिकारी, युवा मोर्चाचे कार्यकर्ते, स्थानिक ग्रामस्थ आणि नागरिक मोठ्या संख्येने उपस्थित होते. मान्यवरांच्या उपस्थितीत पार पडलेल्या या सत्कार सोहळ्याने आंबोलीतील कार्यक्रमाला विशेष रंगत आणली. ज्येष्ठांचा सन्मान, सामाजिक सेवेचा ध्यास आणि आरोग्यविषयक जनहिताचा संकल्प यांची सांगड घालणारा हा उपक्रम उपस्थितांच्या लक्षात राहिला.
