सावंतवाडी : लोकशाहीच्या मंदिरात पारदर्शकतेचा दीप तेवत ठेवण्यासाठी माहिती अधिकार हे प्रभावी लोकशाही अस्त्र ठरले आहे. जनतेच्या प्रश्नांना वाचा फोडत, प्रशासकीय कामकाजात पारदर्शकता आणण्यासाठी आणि नागरिकांच्या माहिती जाणून घेण्याच्या अधिकाराला बळ देण्यासाठी उल्लेखनीय कार्य करणारे माजगावचे रहिवासी तथा माहिती अधिकार पदाधिकारी सुशिल चौगुले यांचा भाजपचे राज्य युवा नेते विशाल परब यांच्या हस्ते बांदा येथे भव्य सत्कार करण्यात आला. माहिती अधिकार क्षेत्रातील त्यांच्या कार्याची दखल घेत करण्यात आलेल्या या सन्मानामुळे त्यांच्या सामाजिक योगदानाचा गौरव झाला.
सामाजिक कार्यकर्ते दयानंद कुबल यांच्या कृषकव्हेंचर प्रोड्युसर कंपनी लिमिटेडच्या बांदा येथील नवीन कार्यालयाच्या उद्घाटन सोहळ्याचे औचित्य साधून हा विशेष सन्मान करण्यात आला. जिल्हा परिषद अध्यक्ष प्रमोद कामत यांच्या हस्ते फीत कापून, तर भाजपचे राज्य युवा नेते विशाल परब यांच्या हस्ते श्रीफळ वाढवून कार्यालयाचे उद्घाटन करण्यात आले. या कार्यक्रमात सुशिल चौगुले यांचा सत्कार करून त्यांच्या माहिती अधिकार क्षेत्रातील उल्लेखनीय कार्याचा गौरव करण्यात आला.
माहिती अधिकार कायद्याच्या माध्यमातून नागरिकांना शासनाच्या कामकाजाची माहिती मिळविण्याचा मार्ग खुला झाला आहे. या कायद्याचा प्रभावी वापर करून लोकशाही मूल्ये, पारदर्शकता आणि जनहिताच्या प्रश्नांना महत्त्व प्राप्त करून देण्यासाठी कार्य करणाऱ्या व्यक्तींचा सन्मान समाजाला नवी प्रेरणा देणारा ठरतो. याच भावनेतून सुशिल चौगुले यांचा करण्यात आलेला गौरव विशेष महत्त्वाचा मानला जात आहे.
या सत्कार सोहळ्यावेळी जिल्हा परिषद अध्यक्ष प्रमोद कामत, भाजपचे राज्य युवा नेते विशाल परब, कोकण कला व शिक्षण विकास संस्थेचे अध्यक्ष दयानंद कुबल, सावंतवाडीचे उपनगराध्यक्ष ॲड. अनिल निरवडेकर, जिल्हा परिषद सदस्य नितीन राऊळ यांच्यासह राजकीय, सामाजिक आणि कृषी क्षेत्रातील अनेक मान्यवर उपस्थित होते.
लोकशाहीची ताकद केवळ कायद्यात नसते, तर त्या कायद्याचा जनहितासाठी प्रभावी वापर करणाऱ्या जागरूक नागरिकांच्या कार्यातही असते. सुशिल चौगुले यांच्या कार्याचा गौरव करणारा हा सन्मान सोहळा माहिती अधिकाराच्या माध्यमातून जनहितासाठी काम करणाऱ्यांना प्रोत्साहन देणारा ठरला.
