सिंधुदुर्ग : आरोग्यसेवेच्या क्षेत्रात मोठ्या शहरांच्या तुलनेत मागे राहिलेल्या कोकणासाठी आता प्रगत वैद्यकीय उपचारांची नवी आशा निर्माण झाली आहे. सिंधुदुर्ग जिल्ह्याच्या वैद्यकीय इतिहासात महत्त्वपूर्ण ठरणारी एओर्टिक व्हॉल्व्ह रिप्लेसमेंट (Aortic Valve Replacement) ही हृदयशस्त्रक्रिया पडवे येथील राणे यांच्या SSPM मेडिकल कॉलेज अँड लाइफटाइम हॉस्पिटलमध्ये यशस्वीरीत्या पार पडली. जिल्ह्यातील प्रगत हृदयविकार उपचारांच्या सुविधांच्या विस्ताराच्या दृष्टीने ही कामगिरी मैलाचा दगड मानली जात आहे.
हृदयाच्या महत्त्वपूर्ण झडपेवर करण्यात आलेल्या या शस्त्रक्रियेमुळे सिंधुदुर्गसह संपूर्ण कोकणातील रुग्णांसाठी आधुनिक हृदयविकार उपचारांची नवी दारे खुली होण्याची आशा निर्माण झाली आहे. यापूर्वी अशा प्रकारच्या प्रगत उपचारांसाठी रुग्णांना मुंबई, पुणे, गोवा किंवा कर्नाटकातील मोठ्या वैद्यकीय केंद्रांकडे धाव घ्यावी लागत असे. मात्र, स्थानिक पातळीवरच अशा स्वरूपाच्या शस्त्रक्रिया करण्याची क्षमता विकसित होत असल्याने रुग्णांना आणि त्यांच्या कुटुंबीयांना मोठा दिलासा मिळण्याची अपेक्षा आहे.
डॉ. अमृतराज नेर्लीकर यांच्या नेतृत्वाखाली यशस्वी शस्त्रक्रिया
ही महत्त्वपूर्ण शस्त्रक्रिया कार्डियाक सर्जन डॉ. अमृतराज नेर्लीकर यांच्या नेतृत्वाखाली पार पडली. कार्डियाक अ‍ॅनेस्थेशियातज्ज्ञ डॉ. विनायक माळी यांनी त्यांना सहकार्य केले. तसेच शस्त्रक्रियेसाठी आवश्यक वैद्यकीय कौशल्य, तांत्रिक सज्जता आणि समन्वय यांच्या बळावर संपूर्ण पथकाने ही जबाबदारी यशस्वीरीत्या पार पाडली.
या शस्त्रक्रियेत डॉ. मिलिंद (असिस्टंट), श्री. रोहित (ब्रदर), श्री. प्रणय (परफ्युजनिस्ट), श्रीमती कविता ओरोसकर (ओटी इन्चार्ज), मिस कविता वातेगावकर (स्टाफ नर्स), मिस अक्षता राणे, श्री. सुशांत बांदेकर, श्री. अनिकेत बास्वर आणि श्री. जगन्नाथ केरकर (ओटी टेक्निशियन), श्री. दिव्यकांत वेंगुर्लेकर व श्री. चेतन तारकर (सपोर्ट स्टाफ), श्री. नागेश व श्री. सुनीत अडारकर (वॉर्ड बॉय), तसेच सुदेश्ना गावंकर (वॉर्ड असिस्टंट) यांनी महत्त्वपूर्ण भूमिका बजावली.
समन्वय, कौशल्य आणि आधुनिक वैद्यकीय सुविधांची यशस्वी सांगड
हृदयशस्त्रक्रिया ही अत्यंत कौशल्यपूर्ण आणि अचूकतेची मागणी करणारी प्रक्रिया आहे. अशा शस्त्रक्रियेसाठी तज्ज्ञ डॉक्टरांसोबतच प्रशिक्षित नर्सिंग स्टाफ, तांत्रिक कर्मचारी, परफ्युजनिस्ट आणि सहाय्यक कर्मचाऱ्यांचे योगदानही तितकेच महत्त्वाचे असते. SSPM हॉस्पिटलमधील वैद्यकीय, नर्सिंग, तांत्रिक आणि सहाय्यक पथकाने एकत्रितपणे काम करत या शस्त्रक्रियेत महत्त्वपूर्ण योगदान दिले.
मोठ्या शहरांवरील अवलंबित्व कमी होण्याची आशा
सिंधुदुर्गसारख्या जिल्ह्यात प्रगत हृदयविकार उपचारांची सुविधा उपलब्ध होणे ही केवळ वैद्यकीय क्षेत्रातील उपलब्धी नसून ग्रामीण आणि दुर्गम भागातील रुग्णांसाठीही आश्वासक बाब आहे. उपचारांसाठी दूरवर प्रवास करणे, त्यासाठी लागणारा वेळ, आर्थिक खर्च आणि रुग्णांच्या नातेवाइकांवरील मानसिक ताण या अडचणी कमी करण्याच्या दृष्टीने स्थानिक आरोग्य सुविधांचे बळकटीकरण महत्त्वाचे ठरते.
SSPM मेडिकल कॉलेज अँड लाइफटाइम हॉस्पिटल, पडवे येथे पार पडलेली ही यशस्वी शस्त्रक्रिया कोकणातील आरोग्यसेवेच्या प्रगतीतील महत्त्वाचा टप्पा ठरत आहे. आधुनिक वैद्यकीय तंत्रज्ञान, तज्ज्ञ डॉक्टर आणि समर्पित आरोग्य कर्मचाऱ्यांच्या एकत्रित प्रयत्नांतून सिंधुदुर्गातच प्रगत उपचार उपलब्ध होण्याच्या दिशेने आशादायी पाऊल पडले आहे.
मोठ्या शहरांकडे धाव घेण्याऐवजी आपल्या जिल्ह्यातच प्रगत उपचार मिळण्याची आशा आता अधिक बळकट झाली आहे. सिंधुदुर्गच्या आरोग्यसेवेच्या क्षितिजावर उमटलेली ही नवी पहाट कोकणातील रुग्णांसाठी दिलासादायक ठरणारी आहे!
