सावंतवाडी : जिद्दीला मेहनतीची जोड, एकाग्रतेला कौशल्याची साथ आणि ध्येयपूर्तीसाठी अथक परिश्रमांची कास धरली की यशाची शिखरेही गाठता येतात, याचा प्रत्यय सावंतवाडीतील मुक्ताई ॲकेडमीच्या साक्षी रामदूरकर हिने आपल्या देदीप्यमान कामगिरीतून घडवून आणला आहे. कॅरमच्या पटावर आपल्या अचूक खेळाची छाप उमटवणाऱ्या साक्षीने विभागीय स्तरावर सलग पाचव्यांदा निवड होण्याचा मान मिळवत आपल्या यशाचा नवा अध्याय लिहिला आहे. तिच्या या विक्रमी यशामुळे मुक्ताई ॲकेडमीच्या शिरपेचात मानाचा आणखी एक तुरा खोवला गेला आहे.
क्रीडा व युवक सेवा संचालनालय, महाराष्ट्र राज्य आणि जिल्हा क्रीडाधिकारी कार्यालय, सिंधुदुर्ग यांच्या संयुक्त विद्यमाने ओरोस येथे जिल्हास्तरीय कॅरम स्पर्धेचे आयोजन करण्यात आले होते. या स्पर्धेत साक्षीने आपल्या खेळातील कमालीची एकाग्रता, अचूक स्ट्रायकर नियंत्रण, संयम आणि जिद्दीच्या जोरावर प्रतिस्पर्ध्यांसमोर दमदार आव्हान उभे केले. तिच्या या उत्कृष्ट खेळाच्या बळावर सतरा वर्षांखालील वयोगटातून विभागीय स्तरावरील स्पर्धेसाठी तिची निवड झाली.
विशेष म्हणजे, इयत्ता दहावीत शिक्षण घेत असतानाच साक्षीने अभ्यास आणि क्रीडा यांचा सुंदर समतोल साधला आहे. कॅरमसोबतच बुद्धिबळ या बौद्धिक कौशल्याच्या खेळातही तिने विशेष प्रावीण्य मिळवले आहे. सलग पाच वर्षे कॅरम आणि बुद्धिबळ या दोन्ही खेळांमध्ये विभागीय स्तरावर निवड होण्याची उल्लेखनीय कामगिरी तिने केली आहे. आयोजकांकडून उपलब्ध माहितीनुसार, अशी कामगिरी करणारी ती राज्यातील एकमेव खेळाडू ठरली आहे.
मुक्ताई ॲकेडमीचे अध्यक्ष तथा ज्येष्ठ कॅरम व बुद्धिबळ प्रशिक्षक कौस्तुभ पेडणेकर सर यांच्या कुशल मार्गदर्शनाखाली साक्षीच्या गुणवत्तेला योग्य दिशा मिळाली. प्रशिक्षकांचे मार्गदर्शन, सातत्यपूर्ण सराव आणि स्वतःच्या मेहनतीच्या जोरावर तिने शालेय राज्यस्तरीय स्पर्धांसह कॅरम असोसिएशनच्या राज्यस्तरीय स्पर्धांमध्येही उल्लेखनीय यश संपादन केले आहे. वयाच्या अवघ्या चौदाव्या वर्षी सतरा वर्षांखालील गटात राज्यस्तरीय स्पर्धेत उपविजेतेपद पटकावण्याची कामगिरी तिच्या प्रतिभेची साक्ष देणारी ठरली आहे.
मुक्ताई ॲकेडमीच्या माध्यमातून गेल्या दहा वर्षांत कौस्तुभ पेडणेकर सर यांच्या मार्गदर्शनाखाली तीन मुलींची राष्ट्रीय स्तरावर, तर सोळा मुला-मुलींची राज्यस्तरावर निवड झाली आहे. ग्रामीण भागातील क्रीडागुणांना व्यासपीठ उपलब्ध करून देत खेळाडू घडविण्याच्या त्यांच्या प्रयत्नांना साक्षीच्या यशामुळे आणखी बळ मिळाले आहे.
आपल्या या यशाचे संपूर्ण श्रेय साक्षीने कौस्तुभ पेडणेकर सर आणि मुक्ताई ॲकेडमीला दिले आहे. साक्षी ही गुणी, मेहनती आणि प्रतिभावान खेळाडू असून तिची भविष्यातील वाटचाल निश्चितच आशादायी असल्याचे कौतुक प्रशिक्षक पेडणेकर सर यांनी केले.
मुक्ताई ॲकेडमीच्या सचिव सौ. स्नेहा पेडणेकर आणि कोषाध्यक्ष बाळकृष्ण पेडणेकर यांनी साक्षीचे अभिनंदन करून तिच्या पुढील क्रीडा वाटचालीसाठी शुभेच्छा दिल्या आहेत.
अभ्यासाच्या वहीसोबत कॅरमचा पटही समर्थपणे सांभाळणाऱ्या साक्षीने आपल्या जिद्दीचा आणि गुणवत्तेचा ठसा उमटवला आहे. तिच्या यशाने सावंतवाडीच्या क्रीडाविश्वाचा गौरव वाढला असून भविष्यात राष्ट्रीय आणि आंतरराष्ट्रीय स्तरावरही ती आपल्या खेळाची चमक दाखवो, अशा शुभेच्छांचा वर्षाव सर्व स्तरांतून होत आहे.
