सावंतवाडी : सोमवार दिनांक 28 जुलै 2025 रोजी सुप्रसिद्ध उद्योजक तथा दानशूर व्यक्तिमत्व पुष्कराज कोले यांनी जिल्हा परिषद केंद्रशाळा वायंगणी सुरंगपाणी शाळेला सदिच्छा भेट दिली. या भेटीदरम्यान त्यांनी अंगणवाडी व इयत्ता पहिली ते सातवीच्या सर्व विद्यार्थ्यांना शालोपयोगी वस्तू व खाऊचे वाटप केले. तसेच शिक्षकवृंद व इतर कर्मचारी, उपस्थित पालक यांनाही भेटवस्तू देऊन गौरविण्यात आले.
शाळेच्या प्रगतीच्या शिरपेचात यशाचा तुरा रोवून उल्लेखनिय कामगिरी करणाऱ्या कुमार गौरांग मिलिंद पंडित, कुमार गौरांग दीपक राजापूरकर , कुमारी रिया गोविंद पेडणेकर यांचा भेटवस्तू व पुष्पगुच्छ देऊन विशेष सन्मान केला.
आईवडील,शिक्षक व समाज हे आपले आद्यगुरू आहेत.त्यांना कायम स्मरणात ठेवा. अभ्यासात सातत्य ठेवा. असे बहुमोल मार्गदर्शन त्यांनी चिमुकल्यांना केले व प्रगतीच्या दिशेने झेप घेणाऱ्या केंद्रशाळा सुरंगपाणी शाळेला पुढील यशस्वी वाटचालीसाठी शुभेच्छा दिल्या.
कार्यक्रमाचे प्रास्ताविक व आभार प्रदर्शन शाळेच्या मुख्याध्यापिका श्रीम. शामल मांजरेकर – पिळणकर यांनी केले. यावेळी व्यासपिठावर समीर कोले, शाळा व्यवस्थापन समिती अध्यक्ष अमित कोरगांवकर, उपाध्यक्षा सौ. वैष्णवी पेडणेकर , शिक्षणप्रेमी तथा माजी शाळा व्यवस्थापन समिती अध्यक्ष प्रवीण राजापूरकर व शिक्षकवृंद उपस्थित होते.
