हूमरमळा जिल्हास्तरीय रस्सीखेच स्पर्धेत कलेश्वर वेत्ये संघ ठरला २८व्यांदा अंतिम विजेता !

कुडाळ : हूमरमळा येथे आयोजित करण्यात आलेल्या जिल्हास्तरीय रस्सीखेच स्पर्धेत कलेश्वर वेत्ये संघाने दिमाखदार कामगिरी करत तब्बल 28व्यांदा अंतिम विजेतेपद पटकावले. संघाच्या या अभूतपूर्व यशामुळे संपूर्ण परिसरात आनंदाचे वातावरण निर्माण झाले आहे.
या उल्लेखनीय यशामागे वेत्ये गावाचे सरपंच गुणाजी गावडे यांचे मार्गदर्शन आणि प्रोत्साहन मोलाचे ठरले. त्यांच्या नेतृत्वाखाली संघाने शिस्त, संघभावना आणि जिद्दीच्या जोरावर प्रतिस्पर्धी संघांवर मात करत विजेतेपद मिळवले.
स्पर्धेदरम्यान कलेश्वर वेत्ये संघातील खेळाडूंनी उत्कृष्ट समन्वय आणि ताकद दाखवून प्रत्येक फेरीत आपली सरस कामगिरी सिद्ध केली. अंतिम सामन्यातही त्यांनी संयम राखत जोरदार खेळ सादर केला आणि विजेतेपदावर आपले नाव कोरले.
या ऐतिहासिक यशाबद्दल संघातील खेळाडू, प्रशिक्षक आणि मार्गदर्शक यांचे सर्वत्र अभिनंदन होत आहे. गावकऱ्यांनीही संघाचे जल्लोषात स्वागत करत त्यांच्या कामगिरीचा गौरव केला.
कलेश्वर वेत्ये संघाच्या या यशामुळे वेत्ये गावाच्या क्रीडा परंपरेत आणखी एक सुवर्णपान जोडले गेले आहे.