सावंतवाडी : क्रीडा, शिस्त आणि सांघिक भावनेचा संगम असलेल्या व्हॉलीबॉल खेळाचा जल्लोष निरवडे येथील संस्कार नॅशनल स्कूलच्या मैदानावर अनुभवायला मिळत आहे. विद्यालयाच्या वतीने आयोजित करण्यात आलेल्या भव्य व्हॉलीबॉल स्पर्धेचे उद्घाटन नुकतेच उत्साहपूर्ण आणि दिमाखदार वातावरणात पार पडले. या स्पर्धेला खेळाडू, क्रीडाप्रेमी आणि परिसरातील नागरिकांचा उत्स्फूर्त प्रतिसाद लाभत आहे.
या क्रीडा महोत्सवाच्या उद्घाटन समारंभासाठी गुजरात येथील सुप्रसिद्ध सामाजिक कार्यकर्त्या तसेच ‘तेजतारा’ संस्थेच्या अध्यक्षा प्रा. दर्शना दोमाडिया या प्रमुख अतिथी म्हणून उपस्थित होत्या. यावेळी प्रा. कक्षा दोमाडिया फाउंडेशनचे संचालक तसेच संस्कार नॅशनल स्कूलचे चेअरमन श्री. शेखर जैन, शिक्षिका राधिका फणशीकर, शिक्षक अजय बांदेकर, ओम नाईक आणि अन्य मान्यवरांची प्रमुख उपस्थिती लाभली.
उद्घाटनप्रसंगी मार्गदर्शन करताना प्रा. दर्शना दोमाडिया यांनी खेळाचे विद्यार्थ्यांच्या सर्वांगीण विकासातील महत्त्व अधोरेखित केले. “खेळामुळे नेतृत्वगुण, आत्मविश्वास, शिस्त आणि संघभावना विकसित होते. जीवनातील यशासाठी शिक्षणाइतकेच खेळही आवश्यक आहेत,” असे त्या म्हणाल्या.
कार्यक्रमाचे अध्यक्षस्थान विद्यालयाचे चेअरमन श्री. शेखर जैन यांनी भूषविले. यावेळी विद्यालयातील शिक्षक, शिक्षकेतर कर्मचारी तसेच विद्यार्थी मोठ्या संख्येने उपस्थित होते.
या स्पर्धेत पंचक्रोशीतील अनेक नामांकित संघांनी सहभाग नोंदवला असून, पहिल्याच दिवसापासून मैदानावर चुरशीचे सामने रंगले आहेत. खेळाडूंच्या दमदार खेळी, अचूक सर्व्हिस, जबरदस्त स्मॅश आणि उत्कृष्ट बचावामुळे प्रेक्षकांमध्ये उत्साहाचे वातावरण निर्माण झाले आहे. सामने पाहण्यासाठी क्रीडाप्रेमींनी मोठी गर्दी केली असून, मैदानावर प्रत्येक गुणाला टाळ्यांचा कडकडाट आणि जल्लोषाचा प्रतिसाद मिळत आहे.
विद्यालयाच्या वतीने सर्व मान्यवरांचे स्वागत करण्यात आले. स्पर्धेचे यशस्वी आयोजन करण्यासाठी शिक्षक व कर्मचाऱ्यांनी विशेष परिश्रम घेतले. या भव्य व्हॉलीबॉल स्पर्धेमुळे निरवडे आणि परिसरातील क्रीडा चळवळीला नवी ऊर्जा मिळाली असून, युवकांमध्ये खेळाविषयीचा उत्साह अधिक वाढला आहे.
