सावंतवाडी : निरवडे येथील नामांकित ‘संस्कार नॅशनल स्कूल’ येथे आयोजित करण्यात आलेली जिल्हास्तरीय व्हॉलीबॉल स्पर्धा २०२६ उत्साह, थरार आणि क्रीडाभावनेच्या अविस्मरणीय वातावरणात संपन्न झाली. जिल्हाभरातील नामांकित संघांच्या सहभागामुळे स्पर्धेला विशेष रंगत प्राप्त झाली असून, क्रीडाप्रेमींनी मोठ्या संख्येने उपस्थित राहून खेळाडूंना उत्स्फूर्त दाद दिली.
अंतिम सामन्यात दमदार खेळाचे प्रदर्शन करत एम.सी.सी. सावंतवाडी संघाने प्रतिस्पर्ध्यांवर मात करून विजेतेपद पटकावले. तर जय माणसेश्वर संघाने तितकीच जिद्द आणि कौशल्य दाखवत उपविजेतेपद मिळविले. अंतिम सामना अत्यंत चुरशीचा झाला असून प्रत्येक गुणासाठी दोन्ही संघांनी दिलेली झुंज प्रेक्षकांच्या टाळ्यांचा कडकडाट मिळवून गेली.
स्पर्धेच्या बक्षीस वितरण समारंभात प्रमुख पाहुणे तथा संस्थेचे अध्यक्ष श्री. शेखर जैन यांच्या हस्ते विजेत्या व उपविजेत्या संघांचा गौरव करण्यात आला. यावेळी बोलताना त्यांनी खेळाडूंना क्रीडा क्षेत्रातील शिस्त, समर्पण आणि सातत्यपूर्ण सरावाचे महत्त्व पटवून देत उज्ज्वल भविष्यासाठी शुभेच्छा दिल्या.
स्पर्धेचे उत्कृष्ट नियोजन स्पर्धा समन्वयक श्री. अजय वामन बांदेकर यांनी केले होते. त्यांच्या नियोजनामुळे संपूर्ण स्पर्धा सुरळीत आणि यशस्वीरीत्या पार पडली.
⭐ वैयक्तिक पुरस्कार विजेते –
स्पर्धेदरम्यान उल्लेखनीय कामगिरी करणाऱ्या खेळाडूंना विशेष पुरस्कारांनी गौरविण्यात आले.
🏐 उत्कृष्ट व्हॉलीबॉलपटू – शिवराम नांदोस्कर
🏐 उत्कृष्ट स्मॅशर – ओमकार रेडकर
🏐 उत्कृष्ट लिब्रो – ओमकार गोसावी
स्पर्धेचे पंच म्हणून राधाकृष्ण पेडणेकर आणि श्यामसुंदर गावडे यांनी अचूक व निष्पक्ष कामगिरी बजावत सामने खेळीमेळीच्या वातावरणात पार पाडले.
खेळाडूंना उत्कृष्ट मैदान उपलब्ध करून देण्यासाठी कु. हर्षद यशवंत डिचोलकर आणि कु. ओम बाबू नाईक यांनी ग्राउंड कीपर म्हणून महत्त्वाची जबाबदारी यशस्वीपणे सांभाळली.
तर संपूर्ण स्पर्धेचे बहारदार सूत्रसंचालन आणि समालोचन श्री. योगेश येरम यांनी केले. त्यांच्या ओघवत्या शैलीमुळे प्रत्येक सामन्याचा थरार प्रेक्षकांनी अक्षरशः अनुभवला.
संस्कार नॅशनल स्कूलच्या या यशस्वी आयोजनाबद्दल सर्व स्तरांतून कौतुकाचा वर्षाव होत असून, जिल्ह्यातील व्हॉलीबॉल खेळाला प्रोत्साहन देणारा हा उपक्रम ठरल्याची भावना उपस्थितांनी व्यक्त केली.
