मालवण : दुर्ग मावळा प्रतिष्ठान, सह्याद्री ॲडव्हेन्चर अँड रेस्क्यू ग्रुप आंबोली–सांगेली तसेच नैसर्गिक पर्यावरण संवर्धन व मानवता विकास संस्था, सिंधुदुर्ग अंतर्गत राष्ट्रीय ऐतिहासिक वास्तू संवर्धन विकास समितीच्या वतीने मालवण तालुक्यातील पेंडूर खरारे येथील वेताळगडावर रविवार दिनांक २३ ऑगस्ट २०२६ रोजी दुर्गभ्रमंती व वृक्षारोपण मोहिमेचे आयोजन करण्यात आले होते.
प्रतिवर्षीप्रमाणे यावर्षीही वेताळ गडावर वीस वृक्षांची लागवड करण्यात आली. गडाच्या ऐतिहासिक वारशाचे जतन करण्यासोबतच गड परिसरातील पर्यावरणाचे संवर्धन करण्याचा संदेश या उपक्रमातून देण्यात आला.
या मोहिमेत सहभागी सदस्यांनी वेताळ गडाची संपूर्ण भ्रमंती करत गडावरील विविध ऐतिहासिक वास्तू, अवशेष व महत्त्वपूर्ण ठिकाणांची पाहणी केली. यावेळी गडाचा इतिहास, त्याचे ऐतिहासिक महत्त्व तसेच सावंतवाडी संस्थांनचे सावंत व करवीरकरांच्या गडाच्या भूमिकेविषयी माहिती जाणून घेतली.
दुर्गभ्रमंती, ऐतिहासिक माहिती आणि वृक्षारोपण अशा तिहेरी उपक्रमामुळे सहभागी सदस्यांमध्ये उत्साहाचे वातावरण होते. इतिहास आणि निसर्ग यांचा सुंदर संगम साधणारा हा उपक्रम सर्वांनी मनापासून अनुभवला. गड संवर्धनाबरोबरच पर्यावरण संवर्धनाची जबाबदारी प्रत्येकाने स्वीकारावी, असा संदेशही या उपक्रमातून देण्यात आला.
या दुर्गभ्रमंती व वृक्षारोपण मोहिमेत एकूण १७ सदस्यांनी उत्स्फूर्त सहभाग घेतला. वेताळगडाच्या ऐतिहासिक वैभवाची ओळख नव्या पिढीला करून देतानाच गड परिसर हिरवाईने समृद्ध करण्यासाठी अशा उपक्रमांचे सातत्याने आयोजन करण्याचा निर्धार यावेळी करण्यात आला.
