सावंतवाडी : सिंधुदुर्ग जिल्ह्यातील सावंतवाडी उपजिल्हा रुग्णालयातील महिला अतिदक्षता कक्षाचा सेंट्रल एसी गेल्या पंधरा दिवसांपासून बंद पडल्याने उकाड्याच्या झळा सोसणाऱ्या महिला रुग्णांचे हाल होत होते. ऑक्टोबर हिटच्या कडाक्यामुळे रुग्णांना प्रचंड उष्णतेचा सामना करावा लागत असताना, या गंभीर समस्येची दखल घेत जीवनरक्षा वैद्यकीय प्रतिष्ठानचे अध्यक्ष राजू मसुरकर यांनी सातत्याने पाठपुरावा केला. अखेर त्यांच्या प्रयत्नांना यश आले असून, बुधवारी सकाळी तांत्रिक कर्मचाऱ्यांकडून दुरुस्ती करण्यात आल्यानंतर महिला अतिदक्षता कक्षातील सेंट्रल एसी पूर्ववत सुरू झाला आहे. त्यामुळे उष्णतेने हैराण झालेल्या महिला रुग्णांना मोठा दिलासा मिळाला आहे.
पंधरा दिवसांचा उकाडा, रुग्णांच्या वेदना अन् पाठपुराव्याची धडपड!
रुग्णालयातील महिला अतिदक्षता विभागाचा सेंट्रल एसी बंद पडल्याने रुग्णांना उकाड्याचा त्रास सहन करावा लागत होता. विशेषतः अतिदक्षता विभागात उपचार घेणाऱ्या महिलांसाठी ही परिस्थिती अधिक गैरसोयीची ठरत होती. या समस्येवर तातडीने तोडगा निघावा, यासाठी जीवनरक्षा वैद्यकीय प्रतिष्ठानचे अध्यक्ष राजू मसुरकर यांनी संबंधित अधिकारी आणि देखभाल-दुरुस्ती करणाऱ्या कंपनीकडे सातत्याने पाठपुरावा केला.
सावंतवाडी उपजिल्हा रुग्णालयाचे अधीक्षक तथा हृदयरोगतज्ज्ञ डॉ. विशाल पाटील यांनीही सेंट्रल एसीच्या दुरुस्तीसाठी जिल्हा रुग्णालयाचे सिव्हिल सर्जन श्रीपाद पाटील यांच्याकडे लेखी मागणी केली होती. तसेच जिल्हा निवासी वैद्यकीय अधिकारी डॉ. सुबोध इंगळे आणि संबंधित जिल्हास्तरीय अधिकाऱ्यांकडेही या प्रश्नाबाबत पाठपुरावा करण्यात आला.
दरम्यान, पुणे येथील संबंधित कंपनीचे देखभाल-दुरुस्ती व्यवस्थापक सुमित काकडे यांच्याशी संपर्क साधून मसुरकर यांनी तातडीने तंत्रज्ञ पाठविण्याची मागणी केली. त्यानुसार बुधवारी सकाळी एसी दुरुस्ती करणारे तंत्रज्ञ रुग्णालयात दाखल झाले. आवश्यक दुरुस्ती पूर्ण झाल्यानंतर महिला अतिदक्षता कक्षातील सेंट्रल एसी पुन्हा सुरू झाला आणि गेल्या पंधरा दिवसांपासून निर्माण झालेल्या समस्येवर अखेर पडदा पडला.
दहा स्टँड फॅनची मदत; संकटातही सामाजिक बांधिलकीचा हात!
सेंट्रल एसी बंद असल्याने रुग्णांना तात्पुरता दिलासा मिळावा, या उद्देशाने राजू मसुरकर यांनी दानशूर व्यक्तींच्या सहकार्याने रुग्णालयाला दहा स्टँड फॅन उपलब्ध करून दिले होते. निवृत्त स्टेट बँक अधिकारी प्रफुल सांगोडकर, हॉटेल व्यावसायिक राजू भालेकर आणि उद्योजक व सामाजिक कार्यकर्ते स्वामी पोकळे यांनी या सामाजिक उपक्रमासाठी सहकार्य केले.
संकटाच्या काळात पुढे सरसावलेल्या या दानशूर व्यक्तींमुळे महिला रुग्णांना तात्पुरता दिलासा मिळाला. आता सेंट्रल एसी पुन्हा सुरू झाल्याने रुग्णांना अधिक आरामदायी वातावरण उपलब्ध होण्यास मदत होणार आहे. रुग्णसेवेतील अडचण दूर करण्यासाठी सामाजिक संस्था, दानशूर व्यक्ती आणि रुग्णालय प्रशासनाने केलेल्या प्रयत्नांचे या निमित्ताने महत्त्व अधोरेखित झाले आहे.
कंपनीचे साडेदहा लाख रुपये थकीत; निधी मिळवून देण्यासाठीही प्रयत्न!
सेंट्रल एसीच्या दुरुस्तीचा प्रश्न मार्गी लावत असतानाच संबंधित कंपनीची सुमारे १० लाख ५० हजार रुपयांची देय रक्कम मिळवून देण्यासाठीही राजू मसुरकर यांनी प्रयत्न सुरू ठेवले आहेत. या रकमेबाबत आवश्यक कागदपत्रांची पूर्तता जिल्हास्तरीय वैद्यकीय अधिकाऱ्यांकडून झाल्याची माहिती त्यांनी दिली. संबंधित कंपनीला लवकरच थकीत रक्कम मिळण्याबाबत आश्वासन देण्यात आले असल्याचेही त्यांनी सांगितले.
रुग्णालयातील यंत्रणा सुरळीत चालणे ही केवळ प्रशासकीय जबाबदारी नसून, रुग्णांच्या आरोग्याशी आणि सुरक्षिततेशी निगडित बाब आहे. त्यामुळे अशा तांत्रिक अडचणी उद्भवल्यानंतर त्यांची तातडीने दुरुस्ती होणे आवश्यक आहे. सावंतवाडी उपजिल्हा रुग्णालयातील महिला अतिदक्षता कक्षाचा बंद पडलेला सेंट्रल एसी पुन्हा सुरू झाल्याने महिला रुग्णांना दिलासा मिळाला असून, राजू मसुरकर यांच्या सातत्यपूर्ण पाठपुराव्याची या निमित्ताने चर्चा होत आहे.
“महिला रुग्णांना उष्णतेचा त्रास सहन करावा लागू नये, यासाठी गेल्या पंधरा दिवसांपासून सातत्याने प्रयत्न सुरू होते. अखेर सेंट्रल एसी सुरू झाल्याने समाधान वाटत आहे. संबंधित कंपनीची थकीत देय रक्कम मिळवून देण्यासाठीही पाठपुरावा सुरू असून, आवश्यक कागदपत्रांची पूर्तता झाली आहे,” अशी माहिती जीवनरक्षा वैद्यकीय प्रतिष्ठानचे अध्यक्ष राजू मसुरकर यांनी दिली.
