नवी दिल्ली : क्रिकेटमध्ये आतापर्यंत वाद झाल्याच्या अनेक घटना झाल्या आहेत. पंचांच्या निर्णयावर खेळाडूंनी भर मैदानात नाराजी व्यक्त केली आहे. अनेकदा नाबाद असतानाही पंचाच्या चुकीचा निर्णयाचा फटका खेळाडूंना बसला आहे. आता डीआरएस सिस्टम आहे. मात्र त्यातही पंचांनी फिल्डवर काय निर्णय दिला आहे तो महत्त्वाचा ठरतो. त्यामुळे अनेकदा खेळाडू आपल्या साहित्यावर राग व्यक्त करून निघून जातात. कोणी बॅट फेकतं, तर कोणी हेल्मेट फेकून राग व्यक्त करतं. पण भारताचा प्रसिद्ध पंच अनिल चौधरी यांनी सांगितलेला एक किस्सा ऐकून तुम्हालाही आश्चर्याचा धक्का बसेल. अनिल चौधरी हे आता आंतरराष्ट्रीय पंच आहेत आणि 2013 पासून बीसीसीआयसोबत आहेत. देशांतर्गत क्रिकेटमध्ये घडलेल्या एका घटनेचा यात उल्लेख केला आहे. यात त्यांनी सांगितलं की पंचाने लाईव्ह सामन्यात बंदूक काढून गोळीबार केला होता. अनिल चौधरी यांच्या पॉडकास्टचा व्हिडीओ सोशल मीडियावर व्हायरल होत आहे. या व्हिडीओत त्यांनी उत्तर प्रदेशच्या एका स्पर्धेचा किस्सा सांगितलं. त्यात पंचांनी गोळीबार केल्याने सामना थांबवावा लागला होता.
अनिल चौधरी याने सांगितलं की, ‘मी युपीच्या एका स्पर्धेत पंच म्हणून गेलो होतो. तेव्हा आम्ही आयोजकांना विचारलं की, तुम्ही दिल्लीहून पंच का बोलवले आहेत. ही स्पर्धा तर लोकल आहे. तेव्हा त्यांनी सांगितलं की, जुन्या पंचाने गोळीबार केला होता. त्या सामन्यात युपीच्या रणजी संघातील काही खेळाडू खेळत होते. त्यांनी पंचांवर इतका दबाव टाकला की त्याला बंदूक काढून गोळीबार करावा लागला. त्यानंतर सामना बंद झाला. तेव्हा आयोजकांनी विचार केला की, इतके पैसे खर्च करून आपण स्पर्धा आयोजिक करतो तर थोडे पैसे देऊन दिल्लीहून पंचांना बोलवावं.’ अनिल चौधऱी यांचा व्हिडीओ सोशल मीडियावर खूपच व्हायरल होत आहे.
