वाशिंग्टन : इराण आणि अमेरिका यांच्यातील संघर्ष थांबला आहे. अमेरिकेचे राष्ट्राध्यक्ष डोनाल्ड ट्रम्प यांनी 5 दिवसांसाठी हल्ले थांबवण्याचा निर्णय घेतला आहे. त्यांच्या या निर्णयाचे जागतिक स्तरावर स्वागत होत आहे. मात्र ट्रंप यांनी स्पष्ट केले आहे की जर इराणने चर्चेद्वारे सहमती दर्शवली नाही, तर त्यांच्यावर बॉम्बहल्ले पुन्हा सुरू केले जातील. यामुळे युद्ध पुन्हा भडकण्याची शक्यता आहे. असे झाल्यास संपूर्ण जगाचं पुन्हा एकदा टेन्शन वाढणार आहे.
डोनाल्ड ट्रम्प नेमकं काय म्हणाले ?
डोनाल्ड ट्रम्प यांनी सोमवारी सांगितले की, अमेरिका आणि इराण यांच्यात सतत संपर्क सुरू असून दोन्ही देश युद्ध समाप्त करण्याच्या अटींवर सहमतीकडे वाटचाल करत आहेत.’ मात्र इराणच्या परराष्ट्र मंत्रालयाने हे दावे फेटाळून लावले असून कोणतीही चर्चा सुरू नसल्याचे म्हटले आहे. तसेच त्यांनी आरोप केला की ट्रंप केवळ ऊर्जा बाजार (तेलाच्या किमती) कमी करण्याचा प्रयत्न करत आहेत.ल
लवकरच तोडगा निघणार?
काही दिवसांपूर्वी इराणला 48 तासांचा अल्टिमेटम देऊन तणाव वाढवणारे ट्रंप यांनी सोमवारी 5 दिवस हल्ले थांबवण्याची आणि इराणसोबत सकारात्मक चर्चा सुरू असल्याची माहिती दिली. फ्लोरिडाहून मेम्फिसला रवाना होताना त्यांनी सांगितले की मध्यपूर्वेसाठी त्यांचे विशेष दूत स्टीव विटकॉफ आणि त्यांचे जावई जेरड कुशनर इराणी प्रतिनिधींशी चर्चा करत आहेत आणि ही चर्चा सकारात्मक दिशेने पुढे जात आहे. ट्रंप म्हणाले, ‘आपण तोडगा काढण्याच्या खूप जवळ आहोत. आमची चर्चा अतिशय मजबूत राहिली आहे. ती कुठपर्यंत पोहोचते ते पाहावे लागेल. अनेक महत्त्वाच्या मुद्द्यांवर आमची सहमती झाली आहे. जवळपास सर्वच मुद्द्यांवर सहमती झाली आहे.’
…तर इराणमध्ये सत्ताबदलाचा विचार करू – ट्रम्प
इराणकडून कोणाशी चर्चा होत आहे, असा प्रश्न विचारल्यावर ट्रंप यांनी सांगितले की, आमचे दूत इराणमधील अशा व्यक्तीशी बोलत आहेत ज्यांना तिथे आदर आहे. मात्र त्यांनी मोजतबा खामेनेई यांच्याशी कोणतीही चर्चा होत नसल्याचे स्पष्ट केले. ट्रंप यांनी असेही संकेत दिले की, जर इराणने माघार घेतली नाही, तर अमेरिका सत्तांतराच्या दिशेने पावले उचलू शकते. ट्रम्प म्हणाले की, ‘वेनेझुएलाप्रमाणे सत्ताबदल करून नवीन नेतृत्व स्थापन करण्याचा विचार केला जाऊ शकतो.’
