सावंतवाडीत क्रिकेटचा रणसंग्राम!, युवा नेते विशाल परबांच्या उपस्थितीने क्रीडा रसिकांमध्ये चैतन्य. ; ‘भाजपा चषक २०२६’ला उत्स्फूर्त प्रतिसाद! 

सावंतवाडी : क्रीडारसिकांच्या उत्साहाने अक्षरशः दुमदुमून गेलेल्या सावंतवाडीत ‘भाजपा चषक २०२६’ या भव्य डे-नाईट क्रिकेट स्पर्धेचा थरार रंगला. भाजपा पुरस्कृत आणि ‘रॉयल किंग’ आयोजित या स्पर्धेला युवा वर्गासह पंचक्रोशीतील क्रीडाप्रेमींचा प्रचंड प्रतिसाद लाभला.
या रंगतदार स्पर्धेला भाजपचे युवा नेते विशाल परब यांनी दिलेल्या खास भेटीमुळे वातावरणात अधिकच ऊर्जा संचारली. त्यांच्या आगमनाने मैदानावर उपस्थित तरुणाईमध्ये जबरदस्त उत्साहाची लाट उसळली. सेल्फी, घोषणाबाजी आणि टाळ्यांच्या कडकडाटात त्यांचे स्वागत करण्यात आले. विशालजींच्या उपस्थितीमुळे स्पर्धेचे आकर्षण अधिकच वाढले असून खेळाडूंनाही प्रेरणा मिळाल्याचे दिसून आले.
या स्पर्धेत महाराष्ट्र, गोवा आणि कर्नाटक या तीन राज्यांतून सहभागी झालेल्या संघांनी आपल्या खेळाच्या जोरावर प्रेक्षकांची मनं जिंकली. चौकार-षटकारांची आतषबाजी, अचूक गोलंदाजी आणि थरारक झुंज यामुळे प्रत्येक सामना प्रेक्षकांसाठी पर्वणी ठरला. रात्रीच्या प्रकाशझोतात रंगणाऱ्या सामन्यांनी मैदानावर खऱ्या अर्थाने आयपीएलची झलक निर्माण केली.
यावेळी भाजपा युवामोर्चा अध्यक्ष हितेन नाईक, मांद्रे सरपंच श्री. सावंत, टीम ओनर मकरंद तोरसकर यांच्यासह अनेक मान्यवरांची उपस्थिती लाभली. त्यांनी खेळाडूंना प्रोत्साहन देत स्पर्धेच्या उत्कृष्ट आयोजनाचे कौतुक केले.
एकूणच, ‘भाजपा चषक २०२६’ ही स्पर्धा केवळ क्रिकेटपुरती मर्यादित न राहता युवा शक्तीचा उत्सव ठरली असून सावंतवाडीच्या क्रीडा इतिहासात या स्पर्धेची नोंद ‘भव्य आणि अविस्मरणीय’ अशीच होणार आहे.