✍️ रुपेश पाटील.
सावंतवाडी : सावंतवाडी संस्थानचे युवराज लखमराजे भोंसले यांचा वाढदिवस आज राजेशाही थाटात आणि उत्साहपूर्ण वातावरणात साजरा करण्यात आला. सामाजिक, शैक्षणिक, सांस्कृतिक आणि राजकीय क्षेत्रातील अनेक मान्यवरांच्या उपस्थितीमुळे राजवाडा परिसर शुभेच्छुकांनी गजबजून गेला होता. विशेष म्हणजे, या सोहळ्यात छोट्या युवराजांच्या उपस्थितीने सर्वांचेच लक्ष वेधून घेतले, तर राजघराण्याच्या परंपरा आणि संस्कारांची सुंदर झलक पाहायला मिळाली.
वाढदिवसानिमित्त मातोश्री राणीसाहेबा शुभदादेवी भोंसले यांच्या हस्ते युवराज लखमराजे यांचे औक्षण करण्यात आले. यावेळी उपस्थित मान्यवरांनी युवराजांना वाढदिवसाच्या शुभेच्छा देत त्यांना उत्तम आरोग्य, दीर्घायुष्य आणि यशस्वी भवितव्यासाठी सदिच्छा व्यक्त केल्या.
या प्रसंगी राजेसाहेब खेम सावंत-भोंसले, युवराज्ञी तथा सावंतवाडी नगराध्यक्षा सौ. श्रद्धाराजे भोंसले, अजय दोडिया, जयश्री दोडिया, श्री पंचम खेमराज महाविद्यालयाचे प्राचार्य डॉ. दिलीप भारमल, ज्येष्ठ पत्रकार तथा सामाजिक कार्यकर्ते अण्णा केसरकर, काका मांजरेकर, जयप्रकाश सावंत, सावंतवाडी नगरपरिषदेचे आरोग्य सभापती सुधीर आडिवरेकर, नगरसेवक आनंद नेवगी, प्रतीक बांदेकर, नगरसेविका दुलारी रांगणेकर, नीलम नाईक, सुकन्या टोपले, दिपाली भालेकर, सुनिता पेडणेकर, सावंतवाडी तालुका पत्रकार संघाचे अध्यक्ष सचिन रेडकर, अखिल भारतीय डिजिटल मीडिया संपादक पत्रकार संघटनेचे कोकण प्रदेशाध्यक्ष प्रा. रुपेश पाटील, पत्रकार विनायक गावंस, रुपेश हिराप, प्रवीण परब, साबाजी परब, अमोल टेंबकर, भुवन नाईक, एस.पी.के. महाविद्यालयातील प्राध्यापक व प्राध्यापकेतर कर्मचारी, तसेच मदर क्वीन इंग्लिश मीडियम स्कूलच्या मुख्याध्यापिका, शिक्षक व शिक्षकेतर कर्मचारी मोठ्या संख्येने उपस्थित होते.
राजवाड्यात दिवसभर शुभेच्छुकांची रीघ लागली होती. विविध क्षेत्रांतील प्रतिष्ठित नागरिक, पदाधिकारी, सामाजिक कार्यकर्ते आणि राजघराण्याचे चाहते यांनी उपस्थित राहून युवराज लखमराजे भोंसले यांना वाढदिवसाच्या शुभेच्छा दिल्या. उत्साह, आपुलकी आणि राजघराण्याविषयीचा आदर यांचा सुंदर संगम या सोहळ्यात अनुभवायला मिळाला.
सावंतवाडीच्या राजघराण्याची परंपरा, संस्कृती आणि जनसंपर्क यांचे दर्शन घडविणारा हा वाढदिवस सोहळा उपस्थितांच्या स्मरणात कायम राहील, अशी भावना अनेकांनी व्यक्त केली.
