सावंतवाडी : संगीत क्षेत्रातील आपल्या वाटचालीत आणखी एक मानाचा टप्पा गाठत कु. मोरेश्वर मंगेश सावंत यांनी हार्मोनियम संगीत परीक्षेत प्रथम श्रेणी मिळवत उल्लेखनीय यश संपादन केले आहे. त्यांच्या या यशामुळे सावंतवाडीच्या संगीत क्षेत्रात आनंदाचे वातावरण निर्माण झाले आहे.
आराध्या संगीत विद्यालय, सावंतवाडी येथे हार्मोनियम संगीताचे शिक्षण घेणाऱ्या मोरेश्वर सावंत यांनी अखिल भारतीय गांधर्व महाविद्यालय मंडळ, मुंबई यांच्या वतीने घेण्यात आलेल्या हार्मोनियम संगीत परीक्षेत हे यश मिळविले. नोव्हेंबर २०२५ मध्ये श्री साई दरबार, कुडाळ येथे ही परीक्षा पार पडली होती. मोरेश्वर यांनी सीट क्रमांक १४०-११९७ अंतर्गत परीक्षा दिली होती.
मोरेश्वर यांनी आराध्या संगीत विद्यालयातील श्री. कपिल कांबळे यांच्या मार्गदर्शनाखाली हार्मोनियमचे शिक्षण घेतले. नियमित सराव, संगीताविषयीची आवड, मेहनत आणि चिकाटी यामुळे त्यांनी परीक्षेत प्रथम श्रेणी मिळवत आपल्या गुणवत्तेची चमक दाखवली.
त्यांच्या या यशाबद्दल आई-वडील, आजी-आजोबा, नातेवाईक, ग्रामस्थ, शिक्षकवर्ग आणि संगीतप्रेमींकडून अभिनंदनाचा वर्षाव होत आहे. हार्मोनियमच्या सुरांमधून भविष्यात आणखी उत्तुंग यश संपादन करावे, अशा शुभेच्छा देत त्यांच्या पुढील संगीत प्रवासासाठी सर्वांकडून मनःपूर्वक शुभेच्छा व्यक्त करण्यात येत आहेत.
