वंदना देवरे .
कल्याण : कल्याणमधून धक्कादायक घटना उघडकीस आली आहे. जोर जबरदस्तीने चार अल्पवयीन मुलींना घरात डांबून ठेवल्याचा प्रकार उघडकीस आला आहे. बेपत्ता मुलीने आईला मेसेज आणि लाईव्ह लोकेशन शेअर केल्याने संपूर्ण प्रकार समोर आला आहे. त्यानंतर आई आणि नातेवाईकांनी पोलिसांत तातडीने धाव घेतली. त्यानंतर संबंधित मुलीसह आणखी तीन अल्पवयीन मुलींची सुटका केली.
मिळालेल्या माहितीनुसार, कल्याणच्या कोळशेवाडी परिसरातून एक धक्कादायक प्रकार घडला. एका घरात तीन ते चार अल्पवयीन मुलींना जबरदस्तीने डांबून ठेवल्याचा आरोप करण्यात आलाय. बेपत्ता असलेल्या एका मुलीने आईला मदतीचा मेसेज पाठवत स्वतःचे लाईव्ह लोकेशन शेअर केल्याने हा प्रकार उघडकीस आलाय. पोलिसांनी तातडीने कारवाई करत मुलींची सुटका केली असून चेतन माने नावाच्या तरुणाला ताब्यात घेतलं आहे. या तरुणावर यापूर्वीही अल्पवयीन मुलींवरील अत्याचारासह गंभीर गुन्हे दाखल असल्याची माहिती समोर येत आहे.
नेमकं काय घडलं?
कल्याण कोळशेवाडी परिसरात राहणारी एक अल्पवयीन मुलगी गेल्या चार ते पाच दिवसांपासून बेपत्ता होती. सुरुवातीला ती मैत्रिणीकडे गेली असावी असा कुटुंबीयांचा समज होता. मात्र शोध घेतल्यानंतर ती कुठेच आढळून आली नाही. दरम्यान, अचानक मुलीच्या मोबाईलवरून तिच्या आईला मेसेज आला. चेतन नावाचा तरुण मला मारहाण करत असून एका घरात डांबून ठेवल्याची माहिती तिने दिली. तसेच कशीतरी खिडकीतून बाहेर पडून एका इमारतीखाली लपल्याचं सांगत मदतीची याचना केली.आईने तातडीने मुलीला लाईव्ह लोकेशन पाठवण्यास सांगितलं आणि 112 क्रमांकावर फोन करून पोलिसांना माहिती दिली. त्यानंतर मुलीची मावशी आणि पोलीस घटनास्थळी पोहोचले.
पोलिसांकडून तपास सुरू
पोलिसांनी त्या ठिकाणाहून संबंधित मुलीसह आणखी दोन ते तीन अल्पवयीन मुलींची सुटका केली. या प्रकरणी पोलिसांनी चेतन माने या तरुणाला ताब्यात घेतलं असून मुलींचे जबाब नोंदवण्याची आणि तक्रार दाखल करण्याची प्रक्रिया सुरू आहे. विशेष म्हणजे, आरोपीवर यापूर्वीही अल्पवयीन मुलींवरील अत्याचार आणि बलात्काराचे गुन्हे विविध पोलीस ठाण्यांमध्ये दाखल असल्याची माहिती समोर आली आहे. सध्या कोळशेवाडी पोलीस या सर्व मुलींची चौकशी करत असून त्यांच्यावर आणखी कोणते अत्याचार झाले आहेत का, याचा तपास सुरू आहे.
