सावंतवाडी : पुस्तकांच्या पानांतून विचारांची पालवी फुटते, ज्ञानाचा दीप तेवत राहतो आणि वाचनातून व्यक्तिमत्त्वाला नवी दिशा मिळते. याच वाचन संस्कृतीला बळ देण्याच्या उद्देशाने मळगाव येथील कै. प्रा. उदय रमाकांत खानोलकर वाचन मंदिराच्या वतीने भारताचे माजी राष्ट्रपती व भारतरत्न डॉ. ए. पी. जे. अब्दुल कलाम यांच्या जयंतीनिमित्त ‘वाचन प्रेरणा दिन’ तसेच ‘उत्कृष्ट वाचक सन्मान २०२६’ सोहळ्याचे आयोजन करण्यात आले आहे.
गुरुवार, दि. १५ ऑक्टोबर २०२६ रोजी सकाळी ठीक ११ वाजता वाचन मंदिराच्या ‘रमाकांत सूर्याजी खानोलकर’ सभागृहात हा प्रेरणादायी सोहळा उत्साहात संपन्न होणार आहे. कार्यक्रमाला प्रमुख अतिथी म्हणून सावंतवाडी येथील मा. श्री. सचिन श्रीरंग धोपेश्वरकर उपस्थित राहणार आहेत.
सन २०२५-२६ या वर्षभरात ग्रंथालयाच्या आजीव, साधारण तसेच बाल वाचक गटातून सर्वाधिक वाचन करणाऱ्या वाचक सभासदांची ‘उत्कृष्ट वाचक’ म्हणून निवड करण्यात आली आहे. ज्ञानाच्या या अखंड साधनेचा गौरव करत मान्यवरांच्या हस्ते या वाचकांचा यथोचित सन्मान करण्यात येणार आहे.
वाचन हे केवळ विरंगुळ्याचे साधन नसून विचारांना समृद्ध करणारे, कल्पनाशक्तीला पंख देणारे आणि समाजाला प्रगल्भ करणारे प्रभावी माध्यम आहे. हीच जाणीव समाजमनात रुजावी, नव्या पिढीमध्ये पुस्तकांविषयी ओढ निर्माण व्हावी आणि वाचनाची ज्योत प्रत्येक घरापर्यंत पोहोचावी, या व्यापक उद्देशाने खानोलकर वाचन मंदिराच्या वतीने हा उपक्रम दरवर्षी राबविण्यात येतो.
ज्ञानाच्या अक्षरदीपाला वाचनाची ज्योत जोडणाऱ्या या प्रेरणादायी सोहळ्याला ग्रंथप्रेमी, वाचनप्रेमी, हितचिंतक तसेच मळगावातील ग्रामस्थांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन कै. प्रा. उदय रमाकांत खानोलकर वाचन मंदिर, मळगाव यांच्या वतीने करण्यात आले आहे.
