सावंतवाडी : पडद्यावरचा धगधगता संवाद, अभिनयातील विलक्षण ताकद, परखड व्यक्तिमत्त्व आणि माणुसकीचा ओलावा… या सगळ्यांचा अनोखा संगम असलेले ज्येष्ठ अभिनेते नाना पाटेकर यांच्या अकाली निधनाने महाराष्ट्रासह देशभरातील कला, सामाजिक आणि सांस्कृतिक क्षेत्रावर शोककळा पसरली आहे. गोव्यातील त्यांच्या निवासस्थानी हृदयविकाराच्या तीव्र झटक्यानंतर त्यांना रुग्णालयात दाखल करण्यात आले; मात्र उपचारादरम्यान त्यांना वाचविण्यात यश आले नाही. त्यांचे वय ७५ वर्षे होते.
नानांच्या निधनानंतर त्यांच्या पार्थिवाचे गोवा मेडिकल कॉलेजमध्ये शवविच्छेदन करण्यात आले. त्यानंतर अंत्यदर्शनासाठी त्यांचे पार्थिव मेडिकल कॉलेजच्या बाहेर ठेवण्यात आले. आपल्या लाडक्या अभिनेत्याला अखेरचा निरोप देण्यासाठी चाहत्यांनी मोठ्या संख्येने गर्दी केली. नानांच्या जाण्याने निर्माण झालेली पोकळी त्यांच्या चेहऱ्यावर स्पष्टपणे जाणवत होती.
‘नाना’ला अखेरचा निरोप देण्यासाठी मान्यवरांची उपस्थिती –
नाना पाटेकर यांच्या पार्थिवाचे अंत्यदर्शन घेण्यासाठी महाराष्ट्र व गोव्यातील विविध क्षेत्रांतील मान्यवर उपस्थित राहिले. महाराष्ट्राचे उद्योगमंत्री डॉ. उदय सामंत यांनी नानांच्या निधनावर तीव्र दुःख व्यक्त केले आहे. नानांसोबतचे आपले नाते केवळ सार्वजनिक नव्हते, तर जिव्हाळ्याचे होते, अशी भावना त्यांनी व्यक्त केली.
तसेच गोव्याचे बांधकाम मंत्री दिगंबर कामत, माजी मुख्यमंत्री प्रतापसिंह राणे, काँग्रेसचे प्रदेशाध्यक्ष गिरीश चोडणकर, भाजपचे प्रदेशाध्यक्ष दामू नाईक, आमदार युरी आलेमाव यांच्यासह विविध क्षेत्रांतील मान्यवरांनी उपस्थित राहून नानांना श्रद्धांजली वाहिल्याची माहिती देण्यात आली आहे.
यावेळी मान्यवरांनी नानांचे पुत्र मल्हार पाटेकर यांची भेट घेऊन त्यांचे सांत्वन केले. वडिलांच्या निधनाचा असह्य आघात सहन करणाऱ्या मल्हार यांच्याप्रती उपस्थितांनी संवेदना व्यक्त केल्या.
चाहत्यांचा जनसागर!, ‘नाना’च्या एका झलकसाठी गर्दी
नानांच्या निधनाची वार्ता वाऱ्यासारखी पसरताच गोवा मेडिकल कॉलेजच्या परिसरात त्यांच्या चाहत्यांची मोठी गर्दी झाली. कोणाच्या डोळ्यांत अश्रू होते, कोणाच्या ओठांवर नानांच्या चित्रपटातील संवाद होते, तर काही जण निःशब्दपणे आपल्या आवडत्या कलाकाराला अखेरचा निरोप देत होते.
पडद्यावर अनेक भूमिका जगणारा हा कलाकार आज स्वतःच आठवणींच्या पडद्याआड गेला होता.
नानांचा अभिनय केवळ अभिनय नव्हता; तो भावनांचा उद्रेक होता. त्यांच्या आवाजातील धार, संवादातील ठसका, चेहऱ्यावरील भाव आणि भूमिकेत पूर्णपणे झोकून देण्याची शैली यामुळे त्यांनी मराठी तसेच हिंदी चित्रपटसृष्टीत स्वतःचे वेगळे स्थान निर्माण केले. क्रांतिवीर, परिंदा, प्रहार, तिरंगा, खामोशी यांसारख्या चित्रपटांपासून पुढील पिढीला भावलेल्या विविध भूमिकांपर्यंत त्यांच्या अभिनयाचा ठसा उमटला.
अभिनयापलीकडचा ‘माणूस’ही हरपला!
नाना पाटेकर यांचे व्यक्तिमत्त्व केवळ रुपेरी पडद्यापुरते मर्यादित नव्हते. ‘नाम फाउंडेशन’च्या माध्यमातून शेतकरी, दुष्काळग्रस्त आणि गरजू कुटुंबांसाठी त्यांनी केलेले सामाजिक कार्य त्यांच्या व्यक्तिमत्त्वाची दुसरी बाजू अधोरेखित करते. त्यामुळे नानांच्या निधनाने केवळ एक ज्येष्ठ अभिनेता नव्हे, तर सामाजिक संवेदनशीलता जपणारा एक आवाजही हरपल्याची भावना व्यक्त होत आहे.
दरम्यान, नानांच्या पार्थिवावर पुणे जिल्ह्यातील डोणजे येथील फार्महाऊसवर शासकीय इतमामात अंत्यसंस्कार करण्यात येणार असल्याची माहिती समोर आली आहे.
पडदा खाली आला… पण ‘नाना’ नावाचा अध्याय अमर!
नानांनी रंगभूमीपासून रुपेरी पडद्यापर्यंत आपल्या कर्तृत्वाची अमीट छाप उमटवली. त्यांच्या जाण्याने एक कलाकार गेला, एक संवेदनशील माणूस गेला आणि लाखो प्रेक्षकांच्या मनातील आपला ‘नाना’ हरपला, अशी भावना उद्योग मंत्री उदय सामंत यांनी व्यक्त केली.
नानांचा आवाज आता प्रत्यक्ष ऐकू येणार नाही; मात्र त्यांच्या भूमिका, संवाद आणि माणुसकीची ओळख पुढील अनेक पिढ्यांच्या स्मरणात घुमत राहील.
‘नाना’ नावाचा हा अध्याय आज संपला असला, तरी त्यांच्या कलेचा आणि माणुसकीचा वारसा कधीच संपणार नाही…!
