संजय वालावलकर.
सिंधुदुर्गनगरी : सिंधुदुर्गच्या विकासाचा ध्यास, पर्यटनाच्या प्रगतीची आस आणि जिल्ह्याच्या उज्ज्वल भविष्याची नवी आशा घेऊन जिल्ह्याचे पालक सचिव तथा माजी जिल्हाधिकारी सन्माननीय वीरेंद्रसिंह यांचे सिंधुदुर्ग जिल्हा परिषदेच्या वतीने स्वागत करण्यात आले. जिल्ह्याच्या विकासप्रक्रियेला अधिक गती देण्यासह विकासाच्या नव्या वाटा खुल्या करण्याच्या दृष्टीने या भेटीदरम्यान सकारात्मक चर्चा झाली.
सिंधुदुर्ग जिल्हा परिषदेचे अध्यक्ष प्रमोद कामत यांनी पालक सचिव वीरेंद्रसिंह यांचे स्वागत केले. यावेळी जिल्हा परिषदेचे उपाध्यक्ष तुकाराम ऊर्फ दादा साईल, जिल्हा परिषदेच्या मुख्य कार्यकारी अधिकारी डॉ. अपूर्वा बासूर (भा.प्र.से.) तसेच शिक्षण व आरोग्य समितीचे सभापती प्रितेश राऊळ आदी मान्यवर उपस्थित होते.
जिल्ह्याच्या विकासाचा अनुभव, भविष्यातील प्रगतीचा ध्यास!
वीरेंद्रसिंह यांनी यापूर्वी सिंधुदुर्ग जिल्हाधिकारी म्हणून कार्यभार सांभाळताना केलेल्या कामगिरीचा उल्लेख करत जिल्हा परिषद अध्यक्ष प्रमोद कामत यांनी त्यांच्या अनुभवाचा आणि प्रशासकीय कार्यक्षमतेचा गौरव केला. यावेळी जिल्ह्यातील विविध विकासकामे, पर्यटनवाढ आणि सिंधुदुर्गला अधिक विकसित जिल्हा म्हणून घडविण्याच्या दृष्टीने आवश्यक असलेल्या उपाययोजनांबाबत सकारात्मक विचारविनिमय करण्यात आला.
निसर्गसौंदर्य, समृद्ध सांस्कृतिक परंपरा आणि पर्यटनाची अमाप क्षमता लाभलेल्या सिंधुदुर्ग जिल्ह्याच्या सर्वांगीण विकासासाठी प्रशासन आणि जिल्हा परिषद यांच्यातील समन्वय महत्त्वाचा असल्याचे या चर्चेतून अधोरेखित झाले. पर्यटनाच्या माध्यमातून रोजगारनिर्मिती, विकासकामांना चालना आणि जिल्ह्याच्या प्रगतीला नवी दिशा देण्याच्या दृष्टीने पालक सचिवांचे सहकार्य मोलाचे ठरणार आहे.
‘सिंधुदुर्गच्या सर्वांगीण विकासासाठी कटिबद्ध!’
सिंधुदुर्ग जिल्ह्याचा पालक सचिव म्हणून जिल्ह्याच्या सर्वांगीण विकासासाठी आवश्यक ते सहकार्य केले जाईल, अशी ग्वाही पालक सचिव वीरेंद्रसिंह यांनी यावेळी दिली. जिल्ह्याच्या विकासासाठी सकारात्मक दृष्टिकोनातून काम करत पर्यटनासह विविध क्षेत्रांत प्रगती साधण्याच्या प्रयत्नांना बळ देण्याचा निर्धारही त्यांच्या भूमिकेतून व्यक्त झाला.
एकीकडे जिल्ह्याच्या विकासाची नवी स्वप्ने, तर दुसरीकडे प्रशासकीय अनुभवाची भक्कम साथ अशा या भेटीमुळे सिंधुदुर्गच्या प्रगतीच्या वाटचालीला नवी ऊर्जा मिळण्याची अपेक्षा व्यक्त होत आहे.
