सावंतवाडी : विज्ञानाच्या जिज्ञासेला ज्ञानाची जोड, अभ्यासाला जिद्दीची साथ आणि गुणवत्तेला परिश्रमांचे बळ लाभले की यशाची शिखरे गाठता येतात, याचा प्रत्यय मदर क्वीन्स इंग्लिश स्कूलच्या विद्यार्थ्यांनी पुन्हा एकदा दिला आहे. सिंधुदुर्ग जिल्हा शिक्षण प्रसारक मंडळ संचलित मदर क्वीन्स इंग्लिश स्कूल, सावंतवाडी येथील विद्यार्थ्यांनी सिंधुदुर्ग जिल्हा विज्ञान मंडळातर्फे आयोजित विज्ञान संबोध परीक्षेत उल्लेखनीय यश संपादन करत शाळेच्या शिरपेचात मानाचा तुरा रोवला आहे. इयत्ता सहावी ते नववीतील विद्यार्थ्यांनी आपल्या गुणवत्तेची चमक दाखवत विज्ञान विषयातील आकलन, अभ्यासू वृत्ती आणि जिद्दीची प्रचिती दिली.
या परीक्षेसाठी इयत्ता सहावी ते नववीमधील एकूण ७४ विद्यार्थी प्रविष्ट झाले होते. विविध इयत्तांमधील विद्यार्थ्यांनी मिळवलेले गुण आणि पटकावलेले क्रमांक शाळेच्या शैक्षणिक गुणवत्तेची साक्ष देणारे ठरले आहेत.
इयत्ता सहावी : मुस्तफिज बेगची प्रथम क्रमांकावर मोहोर!
इयत्ता सहावीमध्ये मुस्तफिज बेग याने ८६ गुण मिळवत प्रथम क्रमांक पटकावला. यश सावंत याने ८१ गुणांसह द्वितीय, तर अहाद बेग याने ८० गुण मिळवून तृतीय क्रमांक संपादन केला.
इयत्ता सातवी : स्वरा आणि प्रेरणाची संयुक्त बाजी!
इयत्ता सातवीमध्ये स्वरा धुरी आणि प्रेरणा कालांत्रे यांनी प्रत्येकी ९४ गुण मिळवत संयुक्तपणे प्रथम क्रमांकावर आपले नाव कोरले. विहान शिर्के, आरोही भाग्यवंत, प्रचिती गिरप आणि अझिमन करोल यांनी प्रत्येकी ९३ गुण मिळवत द्वितीय क्रमांक प्राप्त केला. रिया जेवरे हिने ८९ गुणांसह तृतीय क्रमांक पटकावला.
इयत्ता आठवी : आराध्या गावडेची गुणवत्तापूर्ण कामगिरी!
इयत्ता आठवीमध्ये आराध्या गावडे हिने ६८ गुण मिळवून प्रथम क्रमांक मिळवला. स्वरा राऊळ, समर्थ गवंडळकर आणि अथर्व वेंगुर्लेकर यांनी प्रत्येकी ६७ गुण मिळवत द्वितीय क्रमांक पटकावला. नेरा रॉड्रिग्ज आणि किमया सावंत यांनी प्रत्येकी ६६ गुण मिळवत तृतीय क्रमांकावर आपली मोहोर उमटवली.
इयत्ता नववी : कनिष्का मकदम अव्वल!
इयत्ता नववीमध्ये कनिष्का मकदम हिने ८१ गुण मिळवून प्रथम क्रमांक संपादन केला. अथर्वी मांजरेकर आणि करिष्मा मांजरेकर यांनी प्रत्येकी ६९ गुणांसह द्वितीय क्रमांक मिळवला, तर मृण्मय शिरोडकर याने ६८ गुण मिळवत तृतीय क्रमांक पटकावला.
विज्ञान गौरव परीक्षेसाठी विद्यार्थ्यांची निवड!
या यशाला आणखी एक महत्त्वपूर्ण पैलू लाभला आहे. विज्ञान संबोध परीक्षेतील कामगिरीच्या जोरावर इयत्ता सहावीतील १४, सातवीतील १७, आठवीतील १३ आणि नववीतील १७ अशा एकूण ६१ विद्यार्थ्यांची विज्ञान गौरव परीक्षेसाठी निवड झाली आहे. विद्यार्थ्यांच्या गुणवत्तेची ही भरारी त्यांच्या पुढील शैक्षणिक वाटचालीसाठी निश्चितच प्रेरणादायी ठरणार आहे.
या विद्यार्थ्यांना विज्ञान शिक्षिका श्रीमती साक्षी सावंत आणि श्रीमती फरजाना मुल्ला यांचे मोलाचे मार्गदर्शन लाभले. शिक्षकांचे मार्गदर्शन, विद्यार्थ्यांची मेहनत आणि अभ्यासातील सातत्य यांच्या सुंदर संगमातून हे यश साकार झाले आहे.
यशस्वी विद्यार्थ्यांवर अभिनंदनाचा वर्षाव!
विद्यार्थ्यांच्या या दैदीप्यमान यशाबद्दल सिंधुदुर्ग जिल्हा शिक्षण प्रसारक मंडळाचे अध्यक्ष श्रीमंत राजेसाहेब खेमसावंत भोंसले, चेअरमन श्रीमंत राणीसाहेब शुभदादेवी खेमसावंत भोंसले, कार्यकारी विश्वस्त श्रीमंत लखमराजे भोंसले, विश्वस्त युवराज्ञी श्रद्धाराजे भोंसले, मंडळाचे संचालक श्री. दिलीप देसाई, सहाय्यक संचालक ॲड. शामराव सावंत, मंडळाचे सदस्य श्री. जयप्रकाश सावंत व डॉ. सतीश सावंत तसेच प्रशालेच्या मुख्याध्यापिका श्रीमती अनुजा साळगांवकर यांनी विद्यार्थ्यांचे आणि त्यांना मार्गदर्शन करणाऱ्या विज्ञान शिक्षिकांचे मनःपूर्वक अभिनंदन केले.
यावेळी प्रशालेतील शिक्षक, शिक्षकेतर कर्मचारी आणि पालक-शिक्षक संघाच्या कार्यकारी समितीच्या सदस्यांनीही यशस्वी विद्यार्थ्यांचे कौतुक करून त्यांच्या पुढील शैक्षणिक वाटचालीस शुभेच्छा दिल्या.
विज्ञानाच्या विश्वात जिज्ञासेचे पंख घेऊन भरारी मारणाऱ्या मदर क्वीन्स इंग्लिश स्कूलच्या या गुणवंत विद्यार्थ्यांनी आपल्या यशातून शाळेच्या नावलौकिकात भर घातली आहे. त्यांच्या या यशस्वी वाटचालीतून ज्ञान, मेहनत आणि आत्मविश्वासाच्या बळावर उज्ज्वल भविष्य घडवण्याचा प्रेरणादायी संदेश अधोरेखित झाला आहे.
