बांदा : ज्ञानाचा दीप अखंड तेवत ठेवणाऱ्या आणि शतकाहून अधिक काळ वाचनसंस्कृतीचा वारसा जपणाऱ्या बांदा येथील ऐतिहासिक नट वाचनालयाच्या संचालक मंडळ निवडणुकीत एकमताचा सूर उमटला आहे. सन २०२६ ते २०२९ या तीन वर्षांच्या कालावधीसाठी होणाऱ्या त्रैवार्षिक निवडणुकीत नऊही संचालकांची बिनविरोध निवड झाली आहे. नऊ जागांसाठी नऊच उमेदवारी अर्ज दाखल झाल्याने निवडणुकीतील चुरस टळली असून, सर्व उमेदवारांच्या बिनविरोध निवडीवर शिक्कामोर्तब करण्यात आले.
नट वाचनालयाच्या संचालक मंडळासाठी झालेल्या या निवडणूक प्रक्रियेत जगन्नाथ शांताराम सातोसकर, सौ. अर्चना चंद्रकांत सावंत, राकेश किसनदास केसरकर, निलेश तुकाराम मोरजकर, गुरुनाथ आत्माराम नार्वेकर, नागेश विठ्ठल सावंत, सुधीर नारायण साटेलकर, हेमंत अरुण मोर्ये आणि शंकर मंगेश नार्वेकर यांची बिनविरोध निवड झाली आहे.
या निवडणुकीचे निवडणूक निर्णय अधिकारी म्हणून प्रा. एस. व्ही. नाईक यांनी काम पाहिले. नऊ जागांसाठी नऊच अर्ज प्राप्त झाल्याने निवडणूक प्रक्रिया निर्विघ्नपणे पार पडली. यामुळे आगामी तीन वर्षांसाठी वाचनालयाच्या कारभाराची धुरा सांभाळणाऱ्या नव्या संचालक मंडळाची निवड पूर्ण झाली आहे.
शतकाहून अधिक काळ ज्ञानदानाची परंपरा जपणाऱ्या या वाचनालयाच्या पुढील वाटचालीत नवनिर्वाचित संचालक मंडळाकडून वाचनसंस्कृती संवर्धन, ग्रंथसंपदेचे जतन आणि वाचकाभिमुख उपक्रमांना नवी दिशा मिळेल, अशी अपेक्षा व्यक्त होत आहे.
दरम्यान, नवनिर्वाचित संचालकांचे वाचनप्रेमी, वाचनालयाचे सभासद आणि बांदा परिसरातील नागरिकांकडून अभिनंदन करण्यात येत आहे. आगामी काळात पदाधिकारी निवडीची प्रक्रिया पार पडणार असल्याचे वाचनालयाच्या वतीने स्पष्ट करण्यात आले आहे.
एकमतातून निवड, ज्ञानपरंपरेला नवी उभारी! अशा सकारात्मक वातावरणात नट वाचनालयाच्या नव्या संचालक मंडळाच्या पुढील वाटचालीकडे बांदावासीयांचे लक्ष लागले आहे.



