वेंगुर्ला : भाजपा महिला मोर्चा, वेंगुर्ल च्या वतीने आयोजित आणि युवा नेते विशाल परब पुरस्कृत महिलांसाठी मोफत प्रशिक्षण शिबिराचा भव्य शुभारंभ साई मंगल कार्यालय, वेंगुर्ला येथे उत्साहात संपन्न झाला. शिबिराच्या शुभारंभ प्रसंगी महिला मोर्चाच्या कार्यकर्त्यांनी “आत्मनिर्भर महिला – आत्मनिर्भर भारत” हा नारा देत वातावरण भारावून टाकले. भाजपा महिला मोर्चा वेंगुर्ला तर्फे महिलांसाठी मोफत हस्तकौशल्य प्रशिक्षणाचे उद्घाटन महिला मोर्चा जिल्हाध्यक्षा सौ. श्वेता कोरगांवकर व मान्यवरांच्या हस्ते दीपप्रज्वलन करुन तसेच सावित्रीबाई फुले,जिजामाता व अहिल्याबाई होळकर यांच्या प्रतिमेस पुष्पहार अर्पण करुन करण्यात आले. यावेळी व्यासपीठावर जिल्हा उपाध्यक्षा ॲड. सुषमा प्रभूखानोलकर, तालुकाध्यक्ष सौ. सुजाता पडवळ, उमा फॅशन इन्स्टिट्यूट चिपळूणच्या संचालिका व प्रशिक्षक सौ. उमा म्हाडदळकर, जिल्हा उपाध्यक्षा सौ. वृंदा गवंडळकर, शहराध्यक्ष सौ. श्रेया मयेकर, तालुका चिटणीस सौ. चेतना राजपूत , माजी नगराध्यक्षा डॉ. पुजा कर्पे, अणसुर उपसरपंच वैभवी मालवणकर, सौ.आकांक्षा परब , मा. नगरसेविका सौ. कृपा मोंडकर , सौ. साक्षी पेडणेकर , सौ. प्रार्थना हळदणकर , सौ. रसिका मठकर उपस्थित होत्या.
तसेच यावेळी महिलांना मार्गदर्शन करण्यासाठी सैनिक सहकारी पतसंस्थेचे चेअरमन बाबुराव कविटकर, व्यवस्थापक सुनील राऊळ, व शाखा व्यवस्थापक सौ. ज्योती देसाई उपस्थित होते.
यावेळी उद्घाटनपर भाषणात श्वेताताई कोरगावकर म्हणाल्या की, “महिलांना आत्मनिर्भर बनविणे हीच खरी समाजसेवा आहे. विशालभाई परब यांच्या पुढाकारामुळे वेंगुर्ल्यात अशा प्रकारच्या प्रशिक्षण उपक्रमांना नवी दिशा मिळाली आहे. हे शिबिर महिलांना घरबसल्या रोजगाराचे कौशल्य शिकवून आर्थिक सक्षमीकरणाचा मार्ग खुला करेल.”
शिबिरात महिलांना मोत्यांचे दागिने बनविणे, फॅब्रिक ज्वेलरी तयार करणे, मोत्यांचे महिरप बनविणे, मॅट रंगोळीचे प्रशिक्षण आणि काथ्यापासून फॅन्सी वस्तू तयार करणे या विषयांवर प्रत्यक्ष प्रशिक्षण दिले जाणार असल्याचे उमा इन्स्टिट्यूट , चिपळूण च्या संचालिका व प्रशिक्षक सौ.उमा म्हाडदळकर यांनी सांगीतल.
सुषमा खानोलकर यांनी प्रास्ताविकात सांगितले की, “वेंगुर्ल्यातील महिला आता फक्त घरापुरत्या मर्यादित न राहता उद्योग, व्यवसाय आणि समाजकार्यातही पुढे येत आहेत. अशा शिबिरांच्या माध्यमातून त्या कौशल्यविकासासह आर्थिक स्वावलंबन साधतील.”
आयोजकांनी प्रशिक्षण कार्यक्रमाची रूपरेषा स्पष्ट करताना माहिती दिली की, शिबिर तीन दिवस चालणार असून दररोज दुपारी ३ ते सायंकाळी ६ या वेळेत प्रत्यक्ष प्रशिक्षण होईल. सहभागी महिलांना प्रशिक्षणानंतर प्रमाणपत्रेही देण्यात येतील.
सुजाता पडवळ यांनी आभारप्रदर्शन करताना म्हटले की, “हा उपक्रम केवळ प्रशिक्षणापुरता मर्यादित न राहता भविष्यात महिला उद्योगगट स्थापन करण्याचे पाऊल ठरेल. विशालभाई परब यांचे पाठबळ हेच आमचे प्रेरणास्थान आहे.”
कार्यक्रमात भाजपाचे स्थानिक महीला पदाधिकारी व कार्यकर्ते, तसेच मोठ्या संख्येने महिला उपस्थित होत्या. वातावरणात उत्साह आणि आनंदाचे भाव जाणवत होते.
हा उपक्रम वेंगुर्ला तालुक्यातील महिलांसाठी रोजगारनिर्मिती आणि आत्मनिर्भरतेकडे टाकलेले एक प्रभावी पाऊल ठरल असून, स्थानिक समाजजीवनात सकारात्मक बदल घडविण्याची क्षमता यात आहे.
