सावंतवाडीचा चिमुकला धावपटू ठरला साऱ्यांचा लाडका! ; कबीर हेरेकरची पुन्हा दमदार कामगिरी.

बेळगाव : जिद्द, चिकाटी आणि स्वप्नांच्या बळावर अशक्यही शक्य करता येते, याचे जिवंत उदाहरण म्हणजे सावंतवाडीचा कुमार कबीर हेरेकर! इंडियन आर्मी व अहिल्यानगर सायकलिंग क्लब यांच्या संयुक्त विद्यमाने बेळगाव येथे पार पडलेल्या प्रतिष्ठित हिस्टॉरिक रन स्पर्धेत कबीरने आपल्या ६१व्या मॅरेथॉनमध्ये सहभाग घेत पुन्हा एकदा आपल्या धावण्याच्या कौशल्याची छाप पाडली.
या स्पर्धेत कबीरने दहा किलोमीटरचे अंतर अवघ्या १ तास २ मिनिटांत पूर्ण करत उपस्थितांना अक्षरशः थक्क केले. विशेष म्हणजे, या संपूर्ण स्पर्धेत दहा किलोमीटर अंतर पूर्ण करणारा तो सर्वांत लहान धावपटू ठरला. इतक्या लहान वयात एवढी परिपक्वता आणि सातत्यपूर्ण कामगिरी ही केवळ कौतुकास्पदच नव्हे, तर प्रेरणादायी आहे.
कबीरच्या पावलांमध्ये केवळ वेग नाही, तर स्वप्नांचा ध्यास आणि कठोर मेहनतीची ताकद दडलेली आहे. त्याच्या धावण्यामागील आवड, जिद्द आणि आत्मविश्वास पाहून स्पर्धास्थळी उपस्थित सर्वांनी त्याच्यावर कौतुकाचा वर्षाव केला. प्रत्येक टाळी, प्रत्येक अभिनंदनाचा शब्द हा त्याच्या यशाची साक्ष देणारा ठरला.
अत्यंत कमी वयातच मॅरेथॉनच्या मैदानात आपली वेगळी ओळख निर्माण करणारा कबीर आज सावंतवाडीचा अभिमान बनला आहे. त्याच्या या झंझावाती कामगिरीमुळे तो केवळ एक खेळाडू राहिला नसून, अनेक तरुणांसाठी प्रेरणेचा दीप बनला आहे.
सावंतवाडीच्या भूमीतून उगवलेला हा छोटा तारा, भविष्यात राष्ट्रीय व आंतरराष्ट्रीय पातळीवर झळकणार, यात शंका नाही. कबीरच्या या यशस्वी धावपट्टीचा प्रवास असाच वेगवान आणि उज्ज्वल राहो, हीच सर्वांची अपेक्षा!