सावंतवाडी : यशवंतराव भोसले सैनिक स्कूलमध्ये गोकुळाष्टमीचा उत्सव भक्तिमय आणि उत्साहपूर्ण वातावरणात मोठ्या दिमाखात साजरा करण्यात आला. प्राथमिक तसेच माध्यमिक विभागातील विद्यार्थ्यांनी उत्स्फूर्त सहभाग घेत दहीहंडीचा थरार अनुभवला. विद्यार्थ्यांच्या उत्साहामुळे शाळेचा परिसर जणू नंदलालाच्या गोकुळनगरीतच रूपांतरित झाला होता.
गोकुळाष्टमीच्या निमित्ताने अनेक विद्यार्थी-विद्यार्थिनी राधा-कृष्णाच्या पारंपरिक वेशभूषेत सजून आले होते. त्यांच्या निरागस रूपाने आणि आकर्षक वेशभूषेने संपूर्ण वातावरणाला भक्ती, संस्कृती आणि उत्साहाची मोहक किनार लाभली.
उत्सवाच्या निमित्ताने विद्यार्थ्यांनी भगवान श्रीकृष्णाच्या जीवनावर आधारित समूहगीते, गाणी आणि नृत्यांचे बहारदार सादरीकरण केले. बालकलाकारांच्या या मनमोहक कलाविष्काराला उपस्थितांकडून उत्स्फूर्त दाद मिळाली. कृष्णाच्या बाललीला, गोप-गोपींचे भावविश्व आणि भक्तीमय गीत-नृत्यामुळे कार्यक्रमाला विशेष रंगत आली.
थरावर थर रचत बालगोपालांनी फोडली दहीहंडी!
कार्यक्रमाचा विशेष आकर्षण ठरले ते दहीहंडीचे रोमांचक सादरीकरण! प्राथमिक विभागातील चिमुकल्या गोविंदांनी एकमेकांच्या खांद्यावर थर रचत दहीहंडीपर्यंत मजल मारली आणि जल्लोषात हंडी फोडली. त्यानंतर माध्यमिक विभागातील विद्यार्थ्यांनीही उत्साहाने मानवी मनोरा उभारत दहीहंडी फोडत ‘गोविंदा आला रे!’च्या जयघोषात परिसर दुमदुमून सोडला.
विद्यार्थ्यांच्या उत्स्फूर्त घोषणा, टाळ्यांचा कडकडाट आणि जयघोषामुळे शाळेच्या परिसरात उत्साहाचे वातावरण निर्माण झाले. संघभावना, एकजूट, धाडस आणि समन्वयाचा संदेश देणाऱ्या या दहीहंडीने विद्यार्थ्यांच्या उत्साहाला नवी उंची दिली.
कार्यक्रमाला संस्थेच्या अध्यक्षा ॲड. डॉ. अस्मिता सावंत भोसले, सैनिक स्कूलचे प्राचार्य सॅव्हीओ फर्नांडिस, इंटरनॅशनल स्कूलच्या मुख्याध्यापिका प्रियांका देसाई, उपमुख्याध्यापिका अवंतिका नाईक यांच्यासह शिक्षक व शिक्षकेतर कर्मचारी उपस्थित होते.
विद्यार्थ्यांचा उत्स्फूर्त सहभाग, राधा-कृष्णाच्या वेशभूषेतील बालगोपाल, कृष्णलीलांवर आधारित गीत-नृत्य आणि दहीहंडीचा थरार यामुळे यशवंतराव भोसले सैनिक स्कूलची गोकुळाष्टमी आनंद, भक्ती आणि संस्कृतीचा अविस्मरणीय सोहळा ठरली.
