सावंतवाडी : येथील ज्येष्ठ पत्रकार सीताराम गावडे यांच्या मुलगा समर्थ याच्या बुधवारी रात्री झालेल्या अकाली आणि दुःखद निधनाने गावडे कुटुंबावर दुःखाचा डोंगर कोसळला आहे. या हृदयद्रावक घटनेची माहिती मिळताच पालकमंत्री नितेश राणे यांनी श्री. गावडे यांच्या निवासस्थानी जाऊन कुटुंबीयांची भेट घेत त्यांचे सांत्वन केले.
यावेळी पालकमंत्री नितेश राणे यांनी समर्थला भावपूर्ण श्रद्धांजली अर्पण करत गावडे कुटुंबीयांच्या दुःखात आपणही सहभागी असल्याची भावना व्यक्त केली. या कठीण प्रसंगात धीर न सोडण्याचे आवाहन करत, ईश्वर समर्थच्या आत्म्यास चिरशांती देवो आणि कुटुंबीयांना हे अपरिमित दुःख सहन करण्याचे बळ देवो, अशी प्रार्थनाही त्यांनी केली.
मुलाचे दुःख हे आई-वडिलांसाठी न पचवणारी गोष्ट आहे. मात्र, धीर धरा .. स्वतःला सावरा, कुटुंबीयांची काळजी घ्या, अशा शब्दांत राज्याचे मत्स्य व्यवसाय व बंदरे विकास मंत्री तथा जिल्ह्याचे पालकमंत्री ना. नितेश राणे यांनी पत्रकार सिताराम गावडे व त्यांच्या कुटुंबीयांचे सांत्वन केले.
कोकण लाईव्ह ब्रेकिंग न्यूज चॅनलचे संपादक ज्येष्ठ पत्रकार तथा सकल मराठा व सकल हिंदू संघटनेचे जिल्हाध्यक्ष सिताराम गावडे यांचा पुत्र समर्थ सिताराम गावडे याचे बुधवारी रात्री दहा वाजता दुःखद निधन झाले.
या घटनेची माहिती मिळताच पालकमंत्री नितेश राणे यांनी गुरुवारी १६ रोजी दुपारी सिताराम गावडे यांच्या निवासस्थानी भेट देत त्यांचे सांत्वन केले. ही घटना नक्कीच वेदना देणारी आहे. मात्र, तुम्ही आता धीर धरा. स्वतःची व कुटुंबाची काळजी घ्या, अशा शब्दांत त्यांनी गावडे कुटुंबियांना धीर दिला.
यावेळी सावंतवाडी नगरपरिषदेच्या नगराध्यक्षा सौ. श्रद्धा भोंसले, जिल्हा बँक अध्यक्ष मनीष दळवी, जिल्हा बँक संचालक महेश सारंग, रवि मडगांवकर, गजानन गावडे, विद्याधर परब, नगरपरिषद सभापती सुधीर आडीवरेकर, आनंद नेवगी, प्रतिक बांदेकर, माजी नगरसेवक उदय नाईक, अमित गवंडळकर, बंटी पुरोहित, जिल्हा पत्रकार संघाचे उपाध्यक्ष संतोष राऊळ आदी उपस्थित होते.
